Jonathan Motzfeldt: Inatsisartut suleriaasiat nutarterneqartariaqarpoq

Inatsisartut ullumi ataatsimiimmata oqaluuserisassat tamangajammik tunuartinneqanngikkunik kinguartinneqarput.

- Suliat sumut killissimanersut nalilersortuartarparput. Suleriaaserput taamaappoq, ataatsimiititaliallu sukumiinerusumik paasiniaasoqarnissaanik qinnuteqaateqarpata akuersisarpugut, Inatsisartut siulittaasuata Jonathan Motzfeldtip oqaatigaa, Inatsisartulli suleriaasiat nutarterneqartariaqartoq nassuerutigalugu:

- Inatsisartut suliassaanni piffissalersuisarneq oqaluuserisassat qanoq annertutigineri najoqqutaralugit pilersaarusiorneqartarpoq, siunnersuutilli ima amerlatigilersimappata ukioq naallugu ataatsimiittoqarsinnaavoq, kisianni suleriaaserput nutartertariaqarpoq, nalunngilarput taanna. Suleriaatsitta nutartariaqarnera assortunngilara, aamma suliaraarput maannakkut, Jonathan Motzfeldt oqarpoq, nangipporlu:

- Ilisimatusarfik pillugu inatsisissatut siunnersuut peqquteqavissumik kinguartinneqarpoq. Ilinniartitaanermut naalakkersuisup Tommy Marøp ilaqutaani napparsimasoqarmat siunnersuutip oqaluuserineqarnissaa kinguartinneqarpoq, aamma peerneqanngilaq. Suna paatsoorneqarsimanersoq qulaajarniarlugu susassaqartut tamarmik ataatsimeeqatigineqartussaapput, Inatsisartut siulittaasuat Jonathan Motzfeldt oqarpoq.