Joint Committee pingajussaa ataatsimiippoq
Kalaallit, danskit amerikamiullu suleqatigiissitaliaata, Joint Committee-p, pingajussaanik ataatsimiinnera Københavnimi ullaaq aallartippoq. Atorfilittat nunanit pingasuneersut 65-it danskit nunanut allanut ministereqarfiani Christianshavnimiittumi pisortamit Ulrik Federspielimit tikilluaqquneqarput.
Nunatsinni aatsitassaqarneranik misissuinissamik atsioqatigiittoqassaaq, Nunatsinniit Baltimoremut ukioq ataaseq qaaangiuppat eqqartorneqartussat ilagiinnarpaat.
Christianshavnimiippugut, qanga quersuartut atorsimasuugaluartumi nutarterneqarsimasumi Eigtvedip quersuani maanna Nunanut allanut tunngassuteqartuni ministeriaqarfiup ataatsimiittarfippassuisa allaffippassuisalu inissisimaffigisaanni. Amerikamiut, danskit kalaallillu habitinik atortut takussaapput.
Suleqatigiissitap Joint Committeep ilaasortaasa ataatsimiinnerani ullaaq qulip qeqqa aallartittumi tupaallaataanerpaavoq, siullermeerluni namminersorluni inuuniuteqartunit ataatsimiinneq peqataaffigineqarmat.
Tassa Amerikamiut aluminiumimik tunisassiortuisa nunarsuarmi Aluminiumimik tunisassiortuni annerpaajusut Alcoap aallartitaat marluk ataatsimiinnermi peqataapput, taakku tunisassioriaasertik atorfilittat ittuinut paasissutissiissutigaat.
Aluminiumimik pilersitsiniarneq kallerup inneranik annertuumik atuisarpoq, taamaammallu Alcoap erngup nukinganik nunatsinni nukissiorfiusinnaasut qimerloorpai.
Alcoap aallartitaat nunatsinnut sisamanngorpat tikissapput ilaatigut sapusiorfiusinnaasut misissuiffigiartorlugit, kalaallit nunaatalu aningaasaliiffiginissaa imminut akilersinnaanersoq nalilersinnaalerumallugu.
Suliaq alla aamma oqartussat namminersortullu suleqatigiinnerannik tunngaveqartoq tassaavoq, Baltimorep-Kangerlussuullu akornanni timmisartuussinermik ukiup tullissaani ammaassinissaq. Amerikamiut takornariat taamaalillutik Kalaallit Nunaannut takornariarsinnaanngorlugit.
Amerikamiut Danmarkimi ambassadøriata James Cainip oqaatigaa ataatsimiinnermi suliniutit taakku marluk, oqartussat namminersortullu suleqatigiissinnaanerannut takussutissiilluartut. Siullermik Alcoamut tunngasoq suliaq, kiisalu USA-miit Kalaallit Nunaannut timmisartuussisalernissaq.
Ataatsimiinneq aallartittorlu atorfilittat suleqatigiissitanut sisamanut aggulunneqarput. Peqataasullu 65-iusut eqqartugassaasa ilagaat ilinniartitaaneq, avatangiiseq, peqqinnissaq ilisimatusarneq, niuerneq takornariaqarneq kiisalu nukissiorneq.
