Boris Johnson: Trussip ajornartoornitsinnik aniguitissaqqaarpaatigut
![](/sites/default/files/styles/image_934x467/public/article_images/20220906-090257-l-7836x5226ma.jpg?itok=ig87L50e)
Tuluit Nunaanni maannamut ministeriuneq Boris Johnson, ministeriunertut Londonimi najugaqarfimmi 10 Downing Streetip saavani kingullerpaamik ullumi marlunngornermi oqalugiarpoq.
Partiimi konservatiivit ministeriunermini angusarisimasai taassuma ilaatigut eqqartorpai, tuluit Brexitimik taallugu EU-mit ilaasortaajunnaarneranni coronavirusillu tuniluutilertornerani angusarisimasat ilaatigut taakkartorneqarlutik.
Konservatiivit siulittaasoriligaata Liz Trussip tamakkiisumik tapersersorneqarnissaa, Boris Johnsonip oqalugiarnermini kajumissaarutigaa.
Boris Johnson oqalugiareeruni Skotlandip kangimut avannarpasissortaani illussaarsuarmut Balmoralilassaaq, ministeriunertut tunuarniuteqarnini 96-inik ukiulimmut dronning Elisabethimut pisortatigoortumik tassani nalunaarutiginiarlugu.
AAMMA ATUARUK Liz Truss tuluit siulittaasussaatut qinerneqartoq
Liz Truss, Tuluit Nunaanni konservatiivit siulittaasuattut ippassaq ataasinngornermi qinernerneqarpoq, partiimi ilaasortat 200.000-t akornanni taasisitsisoqarnerani ajugaareerluni Boris Johnson ministeriunertut maanna kingoraartussanngorlugu.
Tuluit Nunaanni inatsisartunut siusinnerpaamik 2024-mi qinersisoqarnissaa nalunaarutiginiarlugu Liz Trussip oqaatigereerpaa, maannna qinersivik tassani aatsaat naasussaammat.
Lizz Trussip Boris Johnsonimut naleqqiullugu ministeriunertut 10 Downing Streetimi angusarissaarnerunissaa, YouGovip inunnik isumasiuinerani apersorneqartut 14 procentii isumaqarput.
27 procentit isumaqarput Johnsonimut naleqqiullugu angusarissaannginnerussasoq.