Johnny May pillugu filmiliaq Canadami takuteqqaarneqartussanngortoq

Timmisartortartoq, Johnny May, Nunavimmi innuttaasut amerlasuut iluaqutigisimavaat. 

Filmi taaguuteqarpoq The Wings of Johnny May - timmisartumik aquttoq nunavimmiu tusaamasaq, inuusuttuugallaramili timmisartunik aquttuusoq, akunnerillu 34.000-it timmisartunik aquttuusimasoq.

Johnny May sila qanorluunniit ajortigigaluarpat annaassiniarluni aallartarsimavoq, inuit sikumi nunamiluunniit ujaarineqartillugit annaassiniartarsimalluni. Inuit amerlasuut ajornartorsiornerpaaffimminniittut annaattarsimavai.

Filmimi takuneqarsinnaasut ilagaat niviarsiarannguaq ataatanilu qimussimik ingerlaartillutik katataasimalluni sikumi annaanniarneqarnera.

Niviarsiarannguaq sikumi sikkussaalluni nikeriarsinnaasimanngilaq, Johnny Mayillu anorersualertinnagu timmisartumik ornippaa, piffissarlu kingulleq atorlugu annaallugu.

Timmisartumik aquttup aappaata niviarsiarannguaq sikumit kaanngartippaa, tigumiarlugulu kissasserlugu, Kuujjuarmut tikinnissamik tungaanut.

Canadami naggueqatigiit Inuit suli inuusinnaagamik Johnny Mayimut qujassutissarpassuaqarput.

Timmisartoq pigisaa, aappaluttumik sungaartunillu qalipaateqartoq, Nunavummi tamani ilisimaneqarluarpoq.

Johnny Mayip tusaamasaaneranut pissutaasunut ilaavoq, juullilernerani mamakujuttunik timmisartumit nunaqarfinnut nakkakaatitsisanera. 

Nunaqarfigisani Kuujjuaq qulaatitsiarlugu timmisartumik ingerlaartarpoq, sukkuaqqanik sukkulaaterpassuarnillu nakkakaatitsilluni nunaqarfiup meerartaanut nuannaarutaaqisumik, tamannalu juullilernerani ileqquuvoq qangali atorneqartoq.

Johnny May pillugu filmiliaq Inuktitut, franskisut tuluttullu oqaasertalerlugu saqqummersinneqassaaq, filmilu taanna Ottawami timmisartunut katersugaasivimmmi qaammatini tulliuttuni takutinneqartassalluni. Johnny Mayip qatanngutigaa Inuit Issittormiut siunnersuisoqatigiiffianni siulittaasuusimasoq, Mary Simon.