Johnny Bredahl eqqartuussivimmi: " Eqqamasaqarsinnaanngilanga"!
Tilluullartup nunarsuarmilu pissartaasimasup, Johnny Bredahl-ip siorna decemerip qaammataani København-imi Strøge-mi angutinit marlunnit 20-inik ukiulinnit persuttarneqarneranut atatillugu eqqaartuussineq ullumi naammassineqartussaagaluarpoq. København-imili politiit eqqartuussinermi uppernarsaasussaq pingaarneq aggersassalugu puigorsimavaat, taamaattumillu eqqartuussinerup naammassineqarnissaa qaammammik aataatsimik kinguartinneqarluni. Ullumi eqqartuussisoqarnerani Johnny Bredahl-ip siorna december-ip qaammataani persuttarneqarnini eqqaamasinnaannginnerarpaa, tamannalu uggoralugulu. Erseqqissumik paasineqartinnagu inuunera ingerlateqqissinnaanngilara Johnny Bredahl eqqartuussivimmi oqarsimavoq. Angutit marluk 20-inik ukiullit Johnny Bredahl-imik persuttaasimasutut unnerluunneqartut aappaa, eqqartuussinermi oqaluttuarsimavoq, imminut illersorniarluni Johnny Bredahl puujaasaaqqamik plastic-imik sanaajusumik miloriarsimallugu, persuttaasimasutullu pinngitsuunerarluni. Persuttaasimasutut unnerluutigineqartup aappaata Johnny Bredahl niaquatigut tukkarsimavaa.
Eqqartuussinermi uppernarsaassutut sassartinneqartut marluk oqaluttuaraat Johnny Bredahl siorna saassunneqarnermi nalaani aalakuunngatsiarsimasoq.
Eqqartuussineq majip ulluisa qulingiluaanni ingerlateqqinneqassaaq uppernarsaasutullu pingaarnerutitaq taamanikkussamut aggersarneqassaq, ullorlu taanna pineqaatissiisoqassalluni.
