Johan Lund Olsen sioorasaarneqartutut misigisimavoq
Angutip taassuma inuusuttup Sermitsiap nittartagaata oqallittarfiani oqaatsit nassuitsuunngitsut atorlugit ilanngussaa, inatsisartuni ilaasortap Johan Lund Olsen-ip sioorasaarinertut tiguaa.
Angut inuusuttoq Namminersornerullutik Oqartussat illuutaannik politikerit qulliunerusut atorfikkaallu akikinaaralutik illusisimanerat pillugu ilanngussamini ima allagaqarpoq: "Kuseriarneq tuppat usersortoqalerpallu Savalimmiunisut pisoqassanerluni. Aallaasit qaqissigit qillersarlugillu!".
Johan Lund Olsen-ip ilanngussaq toqunneqarnissamik sioorasaarinertut nalilerlugu politiinut suliassanngortippaa, politiillu ilanngussamik allagaqartup kinaassusaa misissuinikkut paasereeraat vicepolitikommissær Bent Heiselberg oqarpoq. Suliaq eqqartuussivilersuunneqassanersoq inatsisilerituut misissuinikkut aalajangertussanngorpaat, ilanngutassiarlu Sermitsiap nittartagaaniit piaarnerpaamik peerneqareerpoq.
