Johan Henningsen Nipilersortartut Kattuffianni siulittaasunngorpoq
Inuit Nunaanni Nipilersortartut Kattuffiata maajip 15-iani ileqquusumik ataatsimeersuarnerni siulittaasutut qinigaaqqittoq Leif Immanuelsen, tunuarpoq.
L:I.-p INNK-p siulersuisuinit tunuarnissaminut qinnuteqaataa peqatigiiffinnut INNK-mut ilaasortaasunut tusarniaassutigineqarpoq, peqatigiiffinnillu ilaasortaasunit amerlanerusunit akuerineqarpoq.
Leif Immanuelsen-ip INNK-mi siulersuisuinit tunuarnissaminut qinnuteqaataa tunngaveqarpoq, nuna tamakkerlugu eqqumiitsuliortut Kattuffissuartaavanni ”Eqqumiitsuliornermik Pinngorartitsisut Ingerlatsisullu”-mi 16.maj 2010 pilersinneqartumi siulittaasunngornera. Taamaalilluni INNK-mi ukiuni tulliuttuni marlunni siulittaasuulissaaq siulittaasup tullerisimasaa Johan Henningsen Narsami Nipilersortartut Peqatigiiffianeersoq.
Sinniisussaq siulleq Karl Mathiassen ”Nipiaa” Aasianneersoq siulersuisuunernut ilaasortaalissaaq. Sinniisussatullu inissisimaannassaaq Rune Adolfsen Qaqortumi Nipilersortartut Peqatigiiffianeersoq.
Siulersusisuunerit ukuulerput: Johan Henningsen, Juaaka Lyberth, Hanne Saandvig, Elo Geisler Karl Mathiassen-ilu. Sinniisussarlu Rune Adolfsen
Siulersuisuulersut inissititereerunik nalunaarutigiumaarpaat INNK-p sulinissamini ataatsimeersuanermi aaliangersakkani apeqqutit suut suliniutigineqassanersut.
INNK-p ilanngullugu ilisimatitsissutigaa, kattuffiup allaffia inuttassaqalernissaata tungaanut matoqqagallassasoq.