Joe Biden torrallaanerulaarpoq

Taamaattorli Joe Bidenip unammillertaa Sarah Palin senatorimit misilittagartuumit akisinnaajunnaarsinneqanngilaq.

Joe Bidenip illuatungeraa, Republikanerit præsidentip tullissaatut qinigassanngortitaat, Sarah Palin. Taanna iluatsippallaanngitsumik tv-kkut apersorneqartareersorlu ippassaq akisaqattaannermi iluatsitsinissaa isumalluarfigineqarpallaanngilaq.

Obamamik illersuisut New Yorkimeersut tv-kkut oqallinneq malinnaaffigereerlugu, nassuerutigaat Republikanerit præsidentimut tullersortissatut sassartitaat Sarah Palin ajoriinnagassaanngitsoq.

Præsidentimut tullersortinngorniarlutik sassartut Amerikami aningaasarsiornikkut ajornartorsiorneq annerusumik eqqartorpaat. Aammattaarli Irakimi sorsunneq eqqartorneqangaatsiarpoq.

- Irakimut tunngatillugu John McCain aallaqqaataaniilli kukkussuteqarpoq, Joe Biden oqarpoq.

Sarah Palinip Barack Obama sakkutuunik illersuinnginnerarpaa. Sarah Palinip soqutigineqarnini taamaalilluni John McCainimut saasaraa, Københavnimi Handels Højskolimi ilinniartitsisoq Niels Bjerre Poulsen naliliivoq.

- Sarah Palinip akioriinnertik anigorluaraa oqartoqarsinnaavoq. Taamaattorli qineqqusaarneq John McCainimut iluaqutaasussanngorlugu allanngortinngilaa, aamma oqallinnermi ajutuunngilaq taamalu qinersinerup inerneriumaagaanut sunniuteqangaarnaviarani. Ajutoorsimasuugunimi qinersinerup inerneranut sunniuteqarsimassagaluarpoq. Maanna qinersisartut præsidentimut qinigassanngortittut qinersineq sioqqullugu marloriarlutik tv-kkut oqallitsinneqarnissaat qilanaarisinnaanngorpaat, Niels Bjerre Poulsen oqarpoq.