Joe Biden Kongressimi eqqissiviilliortoqarneranut uneqqusisoq
![](/sites/default/files/styles/image_934x467/public/article_images/20210106-215749-l-1920x1281we.jpg?itok=cqCuYPdj)
USA-mi præsidentinngortussaq, demokraatineersoq, Joe Biden akerliussutimik takutitsisut Kongressimut isaareerneratigut tv-kkut toqqaannartumik USA-p nalunaaqutaa naapertorlugu pingasunngornermi ualikkut oqaaseqarpoq.
- Præsident Trump nuna tamakkerlugu tv-kkut oqaaseqarluni neriorsuutiminik eqqortitsilluni, nunami naalakkersuinikkut aaqqissuussinermut illersuilluni ungasisimanermik unitsitseqqusisariaqarpoq, Joe Biden eqqissiviilliortoqarnera pillugu oqarpoq.
Tamatuma saniatigut kongressip illorsuani pisut sammiveqanngitsut USA-p qanoq ittuuneranik takutitsinngitsoq oqaatigaa.
- Tamat oqartussaaqataanerat maannamut takuneqarsimanngitsumik saassunneqarpoq, tamanna piffissami nutaanerusumi nalaassimanngilarput, Joe Biden oqarpoq.
![](/sites/default/files/styles/image_934x467/public/article_images/20210106-214830-l-1920x1280we.jpg?itok=7D6Tj3V0)
Trumpip akerliussutsimik takutitsisut angerlaqqugai
TV-kkut aallakaatitsiviup CNN-ip politiit akerliussutimik takutitsisunut gassit qulliliornartut atoraat nalunaarutigaa.
Tamatuma saniatigut præsident Donald Trumpimut illersuisut kongressip illorsuavittaanut isaasimasut CNN-imit assit takutippaat.
AAMMA ATUARUK Akerliussutsimik takutitsisut USA-mi kongressi saassukkaat
Bidenip oqaluarnerata kingorna minutsialuit qaangiuttut Trump inoqatinut attaveqaatitigut Twitterikkut videomik ikkussimavoq, tassani akerliussutimik takutitsisut angerlarnissaat kaammattuutigaa.
- Eqqissisimassaagut. Taamaammat angerlaritsi, asavassi, præsident Donald Trump videomi oqarpoq.
Tamatuma saniatigut præsidentip qinersinermi mamianartuliortoqarneraanini uterpaa.
Trumpip video siammartigaa nakuusertoqaratarnissaa pissutigalugu Twitterimit killilerneqartoq
Oqalugiarneq, Trumpip videokkut saqqummersitaa ima oqaasertalerlugu nalunaaqutserneqarpoq:
- Qinersinermi mamianartuliorneraanerit assortuussutaapput, tweet una nakuusertoqaratarsinnaanera pissutigalugu akineqarsinnaanngilaq, ingerlateqqinneqarsinnaanngilaq nuannarineqartutullu toorneqarsinnaanani.
![](/sites/default/files/styles/image_934x467/public/article_images/20210106-211818-l-1920x1280we.jpg?itok=4XkzAGmj)
Akerliussutsimik takutitsisut illorsuarmut isaammata Kongressimi ilaasortat illorsuarmiipput. Taakku sillimaniarnermut sulisunit assersorneqarlutik ingerlanneqarput.