J.K. Rowling persuarsiornartumik nersornaaserneqarpoq

Harry Potter-ip 'arnaa' J.K. Rowling atuakkiornermut nersornaammik H.C. Andersenimut pigitinneqartumik, pilersinneqaqqammersumillu, ullumi siullerpaamik nersornaaserneqarami malunnartumik tulluussimaarpoq.
Allattoq Elisa Isaksen
oktobarip 19-at 2010 09:14

- H.C. Andersen meeqqanut atuakkiornerup Shakespeare-raa, J.K. Rowling nersornaaserneqarnerminut atatillugu taama oqarpoq.

Harry Potterimik atuakkiani, nunarsuarmi tamarmi atuakkiortunit pisuunerpaanngussutigisani pillugit, atuakkiortoq arnaq taanna nersornaaserneqarpoq. Tassami nukappiaraq angakkuarnermik piginnaanilik nassaarisani pissutigalugu 1 milliard dollarsit missaannik akissarsisimavoq.

Nersornaat 500.000 koruuninik aningaasartaqarpoq, taakkulu aningaasaateqarfimminut ilaatigut sianiutit aqqutaasigut nappaammut, arnami toqqutigisaanut, ilisimatusarnermik siunertaqartumut tunniuppai.

Naak Harry Potter pillugu atuakkiat kingullersaat saqqummereeraluartoq, Harry Potterip inuunera pillugu saqqummertoqaqqeriaannaavoq.

- Oqarsinnaavunga Harry Potter pillugu atuakkioqqinnissara ilimananngitsoq... taamaattorli taanna pillugu atuakkioqqinngisaannassallunga oqarsinnaanngilanga, tusagassiortunik katersortitsinermi J.K. Rowling oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq