Jess Svane: Ukiut pingasut feeriarnikuunngilanga
Naluneqanngitsutut borgmester Jess Svanep Qaasuitsup Kommuniani kommunalbestyrelsep ileqquusumik ataatsimiinnissaralua tallimanngormat pisisussaangaluartoq piffissaq kingulleq atorlugu oqarasuaatikkut akulerunnermigut kinguartippaa.
KNR-imit Jess Svane Danmarkimi aasarsiortarfimmi feeriartoq, Qaasuitsup Kommuniani kommunalbestyrelsep tallimanngormat ileqquusumik ataatsimiinnissaraluali kinguartinneqarmat pissarsiarisinnaasimanagu kiisami ullumi iluatsippaa:
- Tassa sulinngiffeqarfissara ukiut pingasungajaat sulinngiffeqarnikuunngereerlunga ukiorli ullut uku sulinngiffeqarfigissallugit aaqqinnikuuvakka. Aamma nalunngilara ataatsimiiffissaq ulloq tallimanngormat ingerlanneqartussaasoq. Kisianni ataatsimiiffissaannartut ingerlanneqanngilaq, Jess Svane oqarpoq.
Kommunalbestyrelsep ataatsimiinneranut tapiliullugu, Qaasuitsup Kommuneata aningaasarliornera pillugu paasiniaaqatigiittoqartussaagaluarpoq, tassanilu ullut marluk atorneqartussaagaluarlutik.
Kommunalbestyrelsep ileqquusumik ataatsimiinnissaanut, taamaatiinnarneqartumulli 257.000 koruunit aningaasartuutaapput. Qaaasuitsup Kommuneata aningaasarliornera ataatsimiinnermi eqqartorneqartussat pingaarnerpaartarigaluarpaat, tassani 15 million koruuninik sipaarnissaq eqqartorneqartussaangaluarluni.
Borgmester Jess Svane KNR-imit aperaarput qaqugu ataatsimiinnissaq tulleq ingerlanneqassanersoq, taannalu ima akivoq:
- Utereeruma ullut qulit missaat qaangiuppata. Siumut aamma Inuit Ataqatigiit kommunalbestyrelse aatsaat utereeruma ataatsimiitinneqarnissaanut piumasaqarsimasut nalunngilakka. Aammalu ataatsimiinnissaq oqarasuaatikkut ingerlanneqassasoq naatsorsuutigaara, Jess Svane oqarpoq.
Qaasuitsup Kommuniani kommunalbestyrelsemut ilaasortap demokraatineersup, Ane Lone Baggerip, Qaasuitsup Kommuniani kommunalbestyrelsemik tallimanngormat ataatsimiititseriaraluarneq Nunatsinni politikkikkut ullortut ajorluinnartutut, cirkussimillu isiginnaartitsissummik takutitsivittut assersuullugu ippassaq qisuariaateqarpoq.
