Jess Svane: Naak kommuninngortussani politikerit akissarsiassaat
Aqaguagunnguaq ukioq 2009 iserfigissavarput, pinngitsoqaratalu najugarput kommune allanngorsimassaaq, Kommunerujussuarnummi ikaarsaassaagut qinikkallu akisussaafferujussuaq tigummilissavaat.
Ullormannali tikillugu kommunalbestyrelseulersussat qanoq qaammammusiaqartinneqassanersut naalakkersuisut aalajangiiffiginngilaat.
Kommunit kattussuunnissaannut piffissarujussuaq atorneqarumaartoq Naalakkersuisut eqqarsaatigisimanngikkaat, Qaasuitsup kommuniani borgmesterinngortussaq Jess Svane oqarpoq.
- Taamaattumik kommuninut qinikkat aalajaalluinnaraluarlutik ilaannikkut ataatsimiigianngitsuuginnarnissartik qinertarpaat, Jess Svane oqarpoq.
Peqqussutit maannakkut atuuttut naapertorlugit kommunalbestyrelsemut ilaasortaq qanorluunniit ataatsimeeqattaartigigaluaruni akileraarut peereerlugu qaammammusiaqartarpoq 3.300 koruunit missaani.
- Kommunerujussuassaq ilusilersoratsigu ilaasortanngortut naammagittarsimaqaat. Suliarujussuarmik suliaqarput akilerneqaratilli, qulliunerusunit suliap pikkunarsinnaassusia takorloorneqarsinnaasimanngimmat, Jess Svane oqarpoq.
Taamaammat kommunerujussuarmi ilaasortaanerup artornarsinnaanera paasereerlugu kommunerujussuarmi ilaasortap nalinginnaasup akileraarut peernagu qaammammut 11.000 koruunit missaani ataatsimiinnersiutisiaqalernissaa ataatsimiititalianilu siulittaasup 15.000 koruuninik qaammammusiaqalernissaa Qaasuitsup kommunianit siunnersuutigineqareerpoq, siunnersuulli tamanna naalakkersuisunit ulloq mannamut suli isummerfigineqanngilaq.
Kalaallit Nunaanni kommuninngortussani sisamani borgmesterit ukiumut 800.000 koruunisiaqartinneqarniarput.
Ataatsimiinnersiutisiassatut Qaasuitsup kommuniata siunnersuutai qaqugu akineqassanersut Naalakkersuisut siulittaasuanut Hans Enoksenimut apeqqutiginiaraluarparput iluatsitsinatali, taanna ulloq naallugu ataatsimiimmat.
