Jess Svane: Ajuusaarnarpoq illersorneqarsinnaananilu

Ajuusaarnarpoq illersorneqarsinnaananilu, inuit tarnip nakorsaanik pisariaqartitsisut orniguffissaqanngimmata. Qaasuitsup Kommuniani borgmesteri Jess Svane taama oqarpoq, Aasianni tarnip nakorsaanik amigaateqarneq pillugu tarnikkut napparsimasup atsiortitsineranut akissummini.

- Illersoruminaattorujussuuvoq taamatut inuttut inissinnermi ikiortissaaruneq. Uagut kommunerujussuarput eqqarsaatigalugu kommuneusimasuni arfineq-pingasuusuni kommuni ataasiinnaq ukiut qassiunersut matuma siornaanerpoq peqarnikuuvoq, kisianni ima suliassartigisimavoq artukkerlugu immaqa kommunemi suliassaqarpallaalerluni inissinnikuulluni taamaammat ajoraluartumik uninnikuuvoq. Taama oqarpoq Qaasuitsup Kommuniani Borgmesteri Jess Svane. Tarnit nakorsaatut atorfiit sisamat piaarnerpaamik inuttassarsiuunneqarput.

Nuna tamakkerlugu tarnip nakorsai immikkut ilinniarsimasut amigaatigineqarmata borgmesterip atorfinitsitsiniarneq qaqugu piviusunngussanersoq eqqoriarsinnaanngilaa.

- Ilinniarluarsimasut kommunini tamani amerlasuuni amigaateqarfiuneri taakku massakkut allanngortikkuminaattorujussuit peqqutaaqataapput, aamma atorfik taama imaannaanngitsigisoq taanna kisimiilluni imaaliallaannaq naammassinninniarsinnaaneq pisinnaanngilaq.

Qaasuitsup Kommuniani katsorsaavinnik pilersitsinissaq politikkikkut siunniussaavoq.

- Katsorsaaviit aamma inuttut ingerlaqqinnissamut suliaqarfiusussat pilersikkiartuaarnissaat takorluukkatsinniipput aamma politikkissatsinni taanna siunniutereernikuuarput, Qaasuitsup Kommuniani borgmesteri Jess Svane oqarpoq.