Jess G. Berthelsenip ajuusaarneq iluarisimaarpaa

Nikolaj Sørensen januaarip ulluisa aqqarnganni tusagassiuutinut nalunaarumminni, arnap kinguaasiutitigut atornerlunneqarsimanerarneqartup takorluukkersaarsimasutullusooq nalilerneqarnera Sulinermik Inuussutissarsiuteqartut kattuffiata, Atorfillit Kattuffiata kiisalu DJØF-ip fællesklubbiata isoraat. Kattuffiit pingasut sinnerlugit Jess G. Berthselsen aperaarput sooq ataatsimoorlutik tusagassiuutinut nalunaaruteqarnersut.

- Tusagassiuutinut kattuffiit pingasuulluta allagaqarpugut, ilaasortavut eqqarsaatigalugit. Ilaasortatta arlaata aamma arnatulli pineqartutut taamatut pineqarsinnaaneri eqqarsaatigalugu, Jess G. Berthelsen oqarpoq.

Jess G. Berthelsen isumaqarpoq, Nikolaj Sørensen sulisuminut ataqqinninnerusariaqartoq.

- Inatsisartoqarfimmi direktørip, allagaqarnera ima inissisimavoq, soorlulusooq sulisoq pineqartoq takorluukkersaarluni nalunaaruteqarsimasoq. Tamannalu kusaginngilarput, Jess G. Berthelsen oqarpoq.

Jess G. Berthelsen oqarportaaq, sumulluuniit eqqartuussiniaratik tusagassiutinut allagaqarlutik.