Jess G. Berthelsen: Sulisartut eqiasunngillat
- Maannakkut sulisussaaleqineq sumiiffinni ataasiakkaani ima nipilerniarneqarpoq, soorlulusooq sulisartut eqiasullutik suliartorusunngitsut; taamaanngilluinnarpoq. Eqqaamaneqartariaqarpoq sulisartut ukioq kaajallallugu aalajaallutik – silarluppat silagippalluunniit – nunatsinni sulisarmata, taamaattumillu soorunami aasaanerani aaamma qasuersaaffeqartariaqarput -ukiorsuarmi kaajallallugu sulereernikuupput. Illoqarfippassuaqarpugut nunaqarfippassuaqarlutalu tunisassiortunik aammalu suli tulaassuiffiusunik. Tupinnanngilarlu sumiiffiit ilaanni sulisussaaleqisoqassappat, isumaqarpungalu pitsaanerusumik aaqqissuussinikkut ajornartorsiut tamanna aaqqiivigineqarsinnaasoq, Jess G. Berthelsen nassuiaavoq, nangillunilu:
- Sulisussaaleqinermik ajornartorsiuteqartarneq Royal Greenlandimiiginnaanngilaq, ajoraluartumimmi suliffeqarfinni allani aamma atuuppoq. Maannakkut nunatsinni 1500-t missaanniittut suliffissaaleqipput, taamaattumik aasaanerani eqaannerusumik aaqqissuisoqartariaqarpoq. Inatsisartut aningaasaliinikuupput illoqarfimmut allamut nuussinnaanermik periarfissiissummik - mobilitetsfondimik taasamik. Taanna eqaannerusumik aaqqiivigineqarsinnaappat, imatut aasaanerani sulisussaaleqinerup nalaani iluaqutaakutsuussagaluarpoq. Taamaattumik isumaqarpunga siunertaq pitsaasoq allanngortinneqartariaqartoq, imatut illoqarfimmut allamut nuunngikkaluarluni suliartorniartillunili atugassanik tassanngaanniit aningaasaliisinnaasoqartariaqartoq, Jess G. Berthelsen oqarpoq.
Sulisussaaleqineq qaangerniarlugu avataaniit sulisussanik tikisitsisalernissamik aalisartut ilaata tapersiutaa qanoq isumaqarfigineraa apeqqutigigatsigu Jess G. Berthelsen tamatuma tunuarsimaarfiginissaa pillugu ima nassuiaateqarpoq:
- Isumaqarpunga avataaniit sulisussarsiornissaq tunuarsimaarfigineqartariaqartoq, nunatsinneersunik sulisussanik ujarlertoqaqqaartariaqartoq, taakkulu sulisussaaleqiffiusunut asaanerani suliartorusunnginnersut aperineqaqqaartariaqartut nunatta avataaneersunik sulisussanik tikisitsisoqartinnagu, SIK-p siulittaasua Jess G. Berthelsen naggasiilluni taama oqarpoq.
Tunitsiviit ilaanni sulisussaaleqineq pillugu Polar Raajat-nut Radioaviisimiit paasiniaagatta, pisortaq Henrik Eriksen oqarpoq, fabrikkini marluusuni sulisussaaleqineq ajornartorsiutiginngikkitsik, paarlattuanilli sulerusullutik qinnuteqartartartut arlaliusut.
