Jess G. Berthelsen: SIK-p uranisiornissaq kissaatigaa
Jess G. Berthelsen ukiut 30-it sinnerlugit siulittaasooreerpoq, maaannalu ukiuni sisamani tulliuttuni sulisartut kattuffiat siulersoqqittussanngorpaa.
- Nuannerpoq, aamma tuppallernarpoq taamatut ukiuni sisamani ingerlaqqinnissanut ataatsimeersuartut aalajangermata, Jess G. Berthelsen KNR-mut oqarpoq.
Kattuffiup malittarisassai malillugit, siulittaasunngorusuttut ataatsimeersuarnissaq qaammatinik pingasunik sioqqullugu kingusinnerpaamik nalunaartussaapput.
Kattuffik: Kuannersuarni aatsitassarsiorta
Siulittaasutut ingerlaqqittoq naapertorlugu, inuussutissarsiornikkut aalisakkat kisimik isumalluutaavallaarput. Inuussutissarsiornerlu taanna ajutumiiallappat nuna puulukissasoq taanna isumaqarpoq.
Taamaattumik kattuffik ataatsimeersuarmat nunap aatsitassarsiorfiunissaa peqataasut amerlanerussutillit isumaqatigiissutigaat. Tassani suliniut assortuussutaasoq, tassalu Narsap Iluani qaqqami Kuannersuarni uranitalinnik piiaanissaq Sulisartut Kattuffiata tapersersorlugu ataatsimeersuarnerminni aalajangerpaa.
- Ataatsimeersuartut aatsitassarsiorneq uranitaqarpat uranitaqanngikkaluarpalluunnit ingerlanneqasinnaasariaqartoq isummerput, tassalu ilaatigut tassani Kuannersuit aamma ilaapput, Jess G. Berthelsen oqarpoq.
AAMMA ATUARUK Jess G. Berthelsen SIK-mi siulittaasutut qinigassanngorteqqittoq
Kattuffimmut ilaasortat ukiuni tullerni sisamani suna naatsorsuutigissavaat? Apeqqut taanna siulittaasup akissutissaqartippaa.
- Nunarput ataatsimut ingerlateqqissagaanni taava, sumiiffiit ilaanni suliffissaaleqineq isumaga naapertorlugu taannaavoq akiugassat pingaarnerit ilaat. Tassami sulinermik inuussutissarsiuteqaratta.
Nunatta naatsorsueqqissaartarfianiit kisitsisit kingulliit takutippaat, juulip qaammataani nuna tamakkerlugu inuit 1299-it suliffissarsiortutut nalunaarsorsimasut.
Ataatsimeersuarnermi taasisinnaasut 41-it sinerissamit aggerfillit peqataapput.