Jess G. Berthelsen SIK-mi siulittaasunngoqqippoq
Suleqatitta Jørgen Semionsenip Jess G. Berthelsen aperaa suliniutissat pingaarnerit maanna suussanersut:
- Ilaasortat sapinngisamik amerlanerpaartaat suliffissaqarnissaat pingaarnerpaavoq. Inuk sulinngitsoq timimigut tarnimigullu nukillaariartulersarpoq, taamaattumik SIK-mi ilaasortat suliffissaqarnissaat pingaarnertut suliniutigissavarput, Jess G. Berthelsen oqarpoq, nangillunilu:
- Ilaasortatta peqqinnissaqarnikkut, akileraartarnikkut, atuarfeqarnikkut, suliffissuaqarnikkut, aatsitassarsiornikkut minnerunngitsumillu inissaqarniarnikkut pitsaanerpaamik atugassaqarnissaat anguniarsarissavarput. Isumaqatigiinniarnerit pingaaruteqaqaat, kisianni taakkartukkakka ilaasortatsinnut pingaaruteqartorujussuupput, aningaasallu pisiniutigineqarsinnaanerat ukiuni tulliuttuni pingasuni sapinngisamik pitsaasumik inissisimatinnissaat pingaaruteqartorujussuuvoq, SIK-mi siulittaasunngoqqittoq Jess G. Berthelsen taama oqarpoq.