Jenseeraq Kodap ukioq mannamut nersornaataanik nersornaaserneqarpoq
2012-imi saqqummersinneqartuni erinniornikkut, taalliornikkut, nipit nipilersuutillu katiterneqarsimaneranni pitsaassutsimigut qaffasinnerpaatut
nalilerneqarluni ukioq mannamut nersornaaserneqartoq tassaavoq erinarsortartoq taalliortorlu Jenseeraq Olsen. Taanna 2011-miilli immikkut maluginiarneqareerpoq, taamani nipilersoqatinilu Uummat Isumalluarnartutut nersornaasigaangami.
Isumalluarnartutut ukioq manna nersornaaserneqartut tassaapput nipilersoqatigiit Small Time Giants Qaqortuminngaanneersut. Taakku ullumi Danmarkimi ilinniagaqarlutik najugaqartuupput. Danmarkimi ilisarisimaneqaleriartuinnarput, tuluttut erinarsorput erinarsuusiaalli Nunatsinni inuunerannit aallaveeqarlutik. Nipilersoqatigiit, erinarsortuallu pikkorilluinnartoq Miki Jensen, nersornaaserneqarnermik kingorna nuannerluinnartumik tusarnaartitsipput tusarnaartullu nikorfaallutik ersaattaappaat.
Ataqqinaammik nersornaat Inunnguaq Petrussenimut 27-nik ukiulimmut tunniunneqarpoq, taanna inuusuttunnguugaluarluni nipilersornikkut sunniuteqarluarsimavoq. Meeraalluni "86 Soorunami"-mik erinarsuutaa nuannarineqarluarpoq aammalu filmip "Qaarmarngup Uummataata" ilisartaanik saqqummersitsisimalluni. Kingorna nipilersoqatigiinni assigiinngitsuni peqataalluni saqqummersitsisarpoq angunni nipilersoqatigiinni Aalummeersoq Iisaavaraq Petrussen peqatigalugu.
Aamma ukiuni kingullerni KNR-imi nipilersorneq pillugu aallakaatitassiortarpoq, Nunatsinni nipilersorneq pillugu atuagassiat siullersaannik "Fuzzi"-mik saqqummersitsisuulluni kingullertigullu aamma nittartakkamik Nunatsinni nipilersortartut allattorsimaffiannik pilersitsisuulluni.
KODA-p Katuami nersornaasiinera Teiturip Savalimmiuneersup Søren Hussillu Danmarkimeersup tusaarnaartitsinerannik naggaserneqarpoq. Nuannisarpaseqaat, aamma quiasaarlutik ilumut Nuup eqqaani arfeqarnersut apeqquserpaat. Namminermigooq takusaqarsimannginnamik.
