Jens Napãtôk' toqqissiallappoq

Naalakkersuisunut ilaasortaasimasoq Jens Napãtôk' ilassinnissutinik atornerluisimasutut pasineqarluni Nunatta eqqartuussivianut sassartinneqarpoq, ataasinngorpallu suliamut aalajangiisoqassaaq.

Unnerluussisoq illersuisorlu ullumi saqqummiussipput, Jens Napãtôk'-llu suliamut tunngatillugu kinguninngua oqaaseqartipparput:

- Sapaatip-akunnerata massuma ingerlasimanera pikkunalaarpoq, aappaatigulli oqaatiginngitsoorumanngilara suliaq kiisami naammassineqartussanngornera nuannaarutigeqigakku. Suliaq kingumut qiviaqattaaginnaraanni inuttut suliffeqarfinnullu sunniuteqartaqaaq, naammassineqalermallu siumut isiginnaanngorpunga, toqqissiallaatigeqalugulu, Jens Napãtôk' oqarpoq.

Eqqartuussinermi unnerluussisup Morten Nielsenip Jens Napãtôk' qaammatini sisamani pinerluuteqarsimasunut inissiisarfimmiittussanngorlugu pineqaatissinneqassasoq piumasaraa, illersuisuatalu Phillip Comerfordip pinngitsuutinneqarluni iperagaanissaa piumasaralugu.

Illersuisup unnerluussisullu saqqummiussineri radioaviisimi unnugu tusagaqarfigisinnaavasi.