Jens Napãtôk' utaqqisariaqassaaq

Jens Napãtôk’ ullumikkut ulloqeqqanut eqqartuussinerup inerneranik nalunaarfigineqartussaagaluartoq, sivikinnerpaamik sapaatip akunnerani ataatsimi suli utaqqeqqittariaqalerpoq.

Nunatta Eqqartuussiviani eqqartuussisuunerup eqqartuussisoqataasalu marluusut, unnerluutiginninnerit 76-init ikinnerunngitsut tamaasa nalilersoqqissaarlugit aalajangiiffigisussaavaat.

- Nunatta Eqqartuussiviani saqqummiunneqartut tamaasa peqqissaarullugit nalilersuiffigisariaqarpavut, Søren Søndergård Hansen radioaviisimut oqarpoq.

Jens Napãtôk’ Nunatta karsiata akiligaanik ilassinnissutinik atornerluisimasutut pasisaalluni eqqartuussivilersuunneqarpoq. Unnerluussisoq Morten Nielsen Jens Napãtôk’ qaammatini sisamani pinerluuteqarsimasunut inissiisarfimmiittussanngorlugu piumasaqarpoq. Illersuisuatali Phillip Comerfordip pinngitsuutitaanissaa piumasaraa, ilassinninnermut ersarissunik malittarisassaqarsimannginnera tunngavilersuutigalugu.

- Eqqartuussinermut atatillugu nalilersuinermi piffissaliussaraluara neriulluarpallaarlunga piffissalersimavara, Eqqartuussisuuneq Søren Søndergård Hansen kinguartitsinermut atatillugu oqarpoq.

Pineqaatissiisoqassanersoq sivikinnerpaamik sapaatip akunnera ataaseq qaangiuppat nalunaarutigineqassaaq.