Jens Imanuelsen: Piniarnermut akuersissutit kommunit akisussaaffigilertariaqarpaat

Aalisarsinnaanermut piniarsinnaanermullu akuersissutinik qinnuteqaateqarnermi akuersissutit sivisuumik ilaatigut utaqqineqarsinnaasarnerat, Jens Imanuelsenip anersaaruluutigaa, akuersissutinillu tuninisisarnerup kommuninut nuunneqarnissaa ujartorlugu:

- Akuersissutinik pissarsiniarnermi sivisoorujussuarmik utaqqisarnerat kommunini misilittagaraarput, kommunit allaffii aqqusaaginnarlugit akuersissuteqartarneq Namminersorlutik Oqartussat allaffiiniimmat, Siumut sinnerlugu Inatsisartunut ilaasortaq Jens Imanuelsen oqarpoq.

Aalisarsinnaanermut piniarsinnaanermullu qinnuteqaatit kommuninut ullumi tunniunneqartarput, Namminersorlutillu Oqartussat kingorna akuersissuteqartarlutik. Tamanna marloqiusamik allaffissornerusoq, Jens Imanuelsen oqarpoq:

- Kommunip tigummilerpagu pisariinnerulissaaq, akikinnerulissallunilu, taavalu marloqiusamik allaffissorneq unitsinneqarluni. Tassa inuiaqatigiinnut pitsaaqutissai, Jens Imanuelsen oqarpoq.

Piniarnermut qaleralinniarnermullu akuersissutit sivisuumik utaqqineqartarnerat sivikillisinniarlugu §37 naapertorlugu taanna upernaaq apeqquteqaateqarpoq. Naalakkersuisuninngaanniilli tamanna pilersaarutaanngitsoq taamanikkut akineqarpoq, maannalu tassa apeqquteqaateqaqqilluni. Ajornartorsiutit oqilisaavigineqarnissaat pillugu Qaasuitsup Kommuniata kommunalbestyrelsiani taanna maanna siunnersuuteqalersaarpoq.

Namminersorlutik Oqartussat qinnuteqaatinik akuersissuteqartarnerisa attatiinnarneqarnissaat pissusissamisoornerusoq, Aalisarnermut Piniarnermullu Naalakkersuisup Karl Lyberthip oqaatigaa:

- Oqartussaasut assigiinngitsut sullitaminnut taava qaninnerulissapput, sullinneqartullu killormaartuanik soorlu aalisartut piniartullu oqartussanut qaninnerulissapput. Tassa tamanna soorunami iluaqutigissavaa, aamma neriuppunga taassuma soorunami kingunerissagaa marloqiusamik allaffissorup annikinnerujussuanngortinnissaa, tassami taanna kommunit aaqqissuuteqqinneqarnerisa anersaarimmagu, aamma siunertarimmagu annertuallaartumik allaffissornerup millisarnissaa, taanna tamatta soqutigigatsigu aamma angorusukkatsigu, Aalisarnermut Piniarnermullu Naalakkersuisoq Karl Lyberth oqarpoq.

Kommunit akuersissutinik tunniussisarsinnaanissaannut taanna ammanerarpoq, eqqaasitsissutigaluguli taamaaliortoqassappat kommunit aamma allaffissornikkut aningaasartuuteqarnerulissagaluartut:

- Tamakkununnga siunnersuisarneit assigiinngitsut qitiusumik inissisimanerat pitsaaneruvoq. Taamaaliunngikkutta kommunit ataasiakkaarlutik tamarmik immikkut sulisoqalissagamik tassunga tunngatillugu. Taanna siunertaanngitsutut uanga takorloorpara. Kisianni soorunami siunertaavoq assigiinngitsut innuttaasunut qanimut sullissinerit, soorlu allagartani tunniussisarnerit allallu kommunit tigunissaat takorlooruminartupilussuuvoq, aamma neriuppunga uanga nammineerlunga kusanartumik aaqqiissuteqarsinnaassallunga kommunit suleqatigalugit, Aalisarnermut, Piniarnermut Nunalerinermullu Naalakkersuisoq Karl Lyberth oqarpoq.