Jens-Frederik Nielsenip Kunngeqarfimmi siunnersuisoqatigiit pillugu takorluugaq soqutiginartikkaa

Naaja Nathanielsenip (IA) nunatta Folketingimut marlunnik ilaasortaqaannarnissaa isumassaqarnersoq  Facebookimi videomi apeqquserpaa.

- Oqallisissaqqissuusoraara Folketingimut nunarput ilaasortaatitaqartuassanersoq, taanna oqarpoq.

Naaja Nathanielsenip inatsit tunngaviusoq 1953-imi pilersinneqarmalli pisoqangaatsiarsimanera, nunattalu tamatuma kingorna Inatsisartoqalerlunilu Naalakkersuisoqalernera, taama isummernerminut tunngavilersuutigaa.  

- Nunatsinni inuiaqatigiit pillugit aallaavigalugillu suliaqartunik namminerisatsinnik ullumikkut Inatsisartoqarlutalu Naalakkersuisoqarpugut.

Kunngeqarfiup iluani siunnersuisoqatigiit

IA-p folketingimut qinigassanngortitaata Danmarkip, Savalimmiut Kalaallit Nunaatalu akornanni 'inatsisartunit inatsisartunut; naalakkersuisunit naalakkersuisunut’ oqaloqatigiinnissaq pissusissamisoortuusoralugu Facebookikkut videoliami oqaatigaa.

- Taamaammat isumaqarpunga nunatta Folketingimi sinniisai marluk qanoq atuunnerat isummersorfissaasoq. Atorunnaarsinneqassappat, imaluunniit suliaat atuuffiilu nutarteriffigineqassappat? Naaja Nathanielsen videomi aperaaq.

Taamatut aperereerluni Kunngeqarfiup iluani siunnersuisoqatigiiliortoqarnissaanik takorluukkani saqqummiuppaa. 

- Inatsisartunut Kunngeqarfiup iluani  siunnersuisoqatigiittarfiliornissarput takorloorsinnaavara, soorlu Nunat Avannarliit Siunnersuisoqatigiiffiattut ittumik, Inatsisartut ataatsimeeqatigiillutik sammisanik ataatsimut soqutigisaqaqatigiiffiusunik oqalliseqatigiiffigisinnaasaannik.

Naaja Nathanielsenip aaqqiissutip taama ittumi, politikerit  namminneq inatsisartuminnut naalakkersuisuminnullu ataasimiinnerit kingorna pituttugaanngitsumik siunnersuuteqarsinnaanissaat siunnersuutigaa.

- Qinigaassagaluaruma tamakku oqaloqataaffigissavakka. Ingasattajaarnerunngilarmi ukiut 70-it qaangiutereersimalersut allannguisoqarnissaanik ujartuineq, ammasumik aaqqiissutissarsiornissaq pissusissamisoorpoq.

Demokraatit soqutiginnittut

KNR-ip Jens-Frederik Nielsen Naaja Nathanielsen Kunngeqarfiup iluani siunnersuisoqatigiiliortoqarnissaa pillugu isumaqatigineraa aperaa.

- Demokraatit nunani avannarlernit Folketingimut ilaasortaasut suleqatigiiffigisaannut pioreersumut nukittorsaasoqarnissaa kingullermik qineqqusaartoqarmat qineqqusaarutigaat, taanna oqarpoq, nangillunilu:

- Suleqatigiinnerulernissaq pingaartittorujussuuara tamannalu uagut pingaartitatsinnut aamma ilaavoq.

Jens-Frederik Nielsenip (D)  Naaja Nathanielsenip (IA) kunngeqarfiup iluani siunnersuisoqatigiiliornissaq pillugu siunnersuutaa soqutiginartikkaluarlugu folketingimi ilaasortaajunnaartitaqarnissaq orniginartinngilaa.  Kalaallit Nunaata Danmarkillu akornanni attaveqatigiinneq allanngortinneqarpat tamanna oqaloqatigiissutigineqarsinnaavoq. Assi © : KNR / Markus Valentin

Demokraatilli Folketingimi kalaallit ilaasortaatitaqarunnaarnissaat piareersimaffiginngilaat.

- Maannakkutut inissisimatilluta Folketingimut soorunami ilaasortaatitaqassaagut, Jens-Frederik Nielsen oqarpoq.

- Aaqqissuussaanerli allaanerusoq toqqarutsigu, assersuutigalugu unioni allatulluunniit, tassunga isumaqataavunga, taava eqqartugassarilissavarput.

Tamarmik arlaannaalluunniit

Tamannali Folketingimi ilaasortaatitaqarunnaarnissamut aamma Kunngeqarfiup iluani siunnersuisoqatigiinnik pilersitsinissamut isumaqataanermut tunngava?

- Apeqqut ammalaarpoq, maannakkut inissisimanitta aaqqissuussaanerani Folketingimiit anissanngitsugut isumaqarpugut. Tunngavilersuutigineqartoq paasisinnaavara, tassa kunngeqarfiup ullumikkut ineriartornera aamma naalakkersuisuniit naalakkersuisunut suleqatigiinneruleriartornerput.

- Kisianni suleqatigiinnerup ingerlalluarnissaanut Folketingimut ilaasortagut pingaartumik atassutaasut isumaqarpunga. Taamaammat maannakkutut inissisimatilluta Folketingimut ilaasortaqarunnaarnissarput kissaatiginngilarput. Muminganilli ersarinnerusumik nipeqassaagut.

Kisianni Folketingimi ilaasortat naalakkersuisut Kalaallit Nunaallu tamarmi sinnerlugit sinniisuunatik tunngaviusumik inatsit naapertorlugu imminut parteertilu siullertut sinnerlugu ilaasortaagunik paatsiveerussaataassanngila?

- Paatsiveerussaataasinnaavoq, taamaammat ataqatigiissaarinissaq pingaaruteqarluinnarmat siammasissumik suleqatigiinnissaq pingaaruteqarpoq.

- Kisianni Folketingimiikkunnaarnissaa oqaluuserissagutsigu aaqqissuussaanermik allannguinissatsinnut allannguinngilaq. Sulili tassaniinnginnitsinni ilaasortaatitaqaannassasugut isumaqarpugut.