Jens-Frederik Nielsen nunap isumannaatsuunera pillugu mianersoqqusivoq atugarissaartoqarnerulernissaanillu neriorsuilluni

- Kinaluunniit isiginnaartitseqataasunut taamaattunut imminut atortittariaqanngilaq, ingammik taakku Nunarput tiguariaannaallugu oqalutsillugit, Jens-Frederik Nielsen (D) oqarpoq.

Ukiaanerani ataatsimiinnermi ulloq siulleq ammaanersiortoqarneranilu oqalugiarpoq.  

Ullumikkut oqalugiaammini inuussutissat akisuallaarnerat, meeqqat atugarissaarnerulernissaat peqqinnissaqarfiullu pitsanngorsarneqarnissaa eqqartorneruai. USA-miilli tatineqarneq aamma eqqartorpaa.  

Amerikamiullu politikkikkut isiginnaartitsisarfianni atortinnginnissamut mianersoqqusilluni.  

- Ukiuni makkunani nunatta nunat tamalaat akornanni alaatsinaanneqarlunilu soqutigineqaleruttorfiani, qinikkat politikkikkullu aalajangersimasumik avatangiisillit eqqarsarluaqqaalaarlutik pissusilersortariaqarput,  Jens-Frederik Nielsen oqaluttarfimmiit oqarpoq: 

- Ajoraluartumik  oqartoqarsinnaanngilaq oqaloqateqartoqartarpat, isumaqartoqarlunilu taakkunannga ajoqutigisinnaasatsinnik atornerlunneqarunnanngitsut. Piffissami nalorninartorsiuffiusumi pingaaruteqarpoq sumik eqqartuineq aamma kikkunnut anngussineq eqqarsaatigissallugu.

Naalakkersuisut siulittaasuata, Jørgen Boassen Amerikamiullu republikanerit arlallit nunatsitut ilusilikkamik Amerikamiulli erfalasuannik qallikkamik kaagisuummata aamma pinngitsuusaarnerunnginnerarpaa: 

- Pinngitsuusutut oqartoqarsinnaanngilaq, inuit ataasiakkaat Nunarput Amerikamiut erfalasuannik qallerlugu kaagiliaralugu agguluttorlugu tamanut takoqqusaartunut akuullutik imminnut atortittarnerat: 

- Manna tassaanngilaq partipolitiki aallaavigalugu qinngasaarunneq. Nunattaana sillimaniarnikkut inissisimanera pineqartoq. Innuttaasununa toqqissisimasutut misigisimanerat pineqartoq. Avataaniit tatineqarnerput annertusiartuinnartillugu, kalaaliusugut ataatsimut nipeqarnissarput aamma uani pineqarpoq.

Innuttaasunut neriorsuutit pingasut

Jens-Frederik Nielsen innuttaasut naalakkersuisunit ukiuni tulliuttuni naatsorsuutigisinnaasaannik pingasunik neriorsuuteqarpoq.  

Siullertut aningaasaqarnikkut akisussaaffeqartumik politikkeqarnissaq qulakkeerneqassaaq. Tamanna ilaatigut soraarnerussutisiaqarnermut tunngassutilinni aaqqissuusseqqinnissaq pineqarpoq, aamma inuussutissarsiutilinnut akileraartarnikkut ukioq manna aaqqissuusseqqittoqarnissaa pineqarluni. 

Aappaattut, atugarissaartoqarnerulernissaa anguniarneqassaaq: 

- Peqqinnissaqarfik kivittariaqarpoq. Meeqqat ilaqutariillu siusinaartumik naapigiarneqartassapput angerlarsimaffiup avataanut inissiisarnerit ikilinerussammata. Paaqqinnittarfiit, atuarfiit ilinniarfiillu nukittorsarneqassapput, meeqqat inuusuttullu amerlanerusut iluatsittumik ingerlanissaannut periarfissat piviusorsiortut qulakkeerniassagatsigit, Jens-Frederik Nielsen oqaluttarfimmiit oqarpoq. 

Siulittaasup peqqinnissaqarfiup tatineqarnera paasivaa, aammalu sulisoqarniarneq, sivisuumik utaqqisoqartarnera sulisullu tuaviinnaq sulisarnerat ajornartorsiutaasut paasillugu.  

- Taamaattumik Naalakkersuisut sulissutigaarput peqqinnissaqarneq eqqarsaatigalugu isumaqatigiissummik ilasamik pilersitsisoqassasoq. Atorfinitsitassarsiornerit sulisunillu atorfimminniiginnartitsisarnissaq nukittorsartariaqarpagut: 

- Suliffiup iluani qaffakkiartorsinnaaneq periarfissagissaarnerutittariaqarparput. Digitalimik aaqqiissutissat silatusaartumik atortariaqarpagut, ingammik nunaqarfiit avinngarusimanerusullu eqqarsaatigalugit. Nappaassuarmut kræftimut tunngasuni tulleriiaarinerusumik periuseqarluni suleriaaseqarnissaq qulakkeertariaqarparput, misissueriaatsit nakorsaariaatsillu sukkanerusumik ingerlanneqartalissapput. Tarnikkut nappaatit timikkut nappaatitulli pimoorutsigalugit iliuuseqarfigisassavagut. 

Naalakkersuisut ataatsimiinnerminni aamma meeqqat atuarfii pitsaanerulersikkusuppaat: 

- Naalakkersuisuni naatsorsuutigilluinnarparput meeqqat atuarfiat pillugu inatsisip malunnaatilimmik allannguivigineqarnissaa pillugu siunnersuuterput Inatsisartut ataatsimiinneranni matumani akuerineqarumaartoq:

- Naatsorsuutigilluinnakkatta ilaat tassaavoq sapiissuseqarluta nassuerutigissagipput ilinniarneq nerriveeqqap saanut ingilluni atuagarsornerinnaanngimmat. Meeqqat ilaasa niaqorsorlutik ilikkarnarnerutittarpaat. Ilaasa assassortarissat atorlugit ilikkarnarnerutittarpaat. 

Inuussutissat akisuut meeqqallu navianartorsiortut 

Inuiaqatigiinni pissakinnerusut aamma isumagineqarnerulissapput. 

Jens-Frederik Nielsenip oqalugiaammini erseqqissumik oqaatigaa: 

- Ulluinnarni inuunermi aningaasartuutit amerliartuinnarput. Ilaqutariippassuit tamanna ulluinnarni inuunerminni malugillualereerpaat pisiniarfinni nioqqutissanik pisiniaraangamik, Jens-Frederik Nielsen oqarpoq: 

- Taamaattumik Naalakkersuisut pissakinnerusunut siunniusimaffeqarlutik iliuuseqarfiginissaat sulissutigissavaat. Soraarninngorsimasut. Aningaasarsiakinnerusut. Ilaqutariit meerartallit. Taakkuupput aningaasanik naammattusaariniarlutik ilungersornerpaasartut. Aningaasat ataasiaannakkamik tunniussassat pissutsit tamakkerlugit aaqqiivigisinnaanngilaat. Aaqqissuusseqqinnertut ataavartussatut suliaanngilaq. Inuussutissanut akikillissutaajunnanngillat. Kisianni maannangaaq pissutsinut tigussaasumik ikiuutissatut atorneqarsinnaapput. 

Meeqqat angerlarsimaffiup avataanut inissinneqarsimatillugit, inuiaqatigiit ‘imminnut takusinnaasariaqarnerarpai’:

- Meeraq angerlarsimaffimminiit avataanut inissinneqaraangat, taama aalajangiisarneq imaannanngitsorsuuvoq. Ilaannikkulli pisariaqartarpoq. Meeqqamut iluaqutaanerusussaq salliutinneqartuaannartassaaq. Meeraq angerlarsimaffimmiitinneqartassanngilaq persuttaaffiusartumi, nakuuserfiusumi atornerluiffiusumi sumiginnaaffiusumilu. Poortornagu tamanna oqaatigisariaqarpoq. Taamaattoq aamma poortornagu nassuerutigisariaqarparput meeqqanik angerlarsimaffiit avataannut inissiisarnerit amerlavallaarujussuartut.     

Angerlarsimaffiup avataanut inissiinerit kommuninut aningaasartuuteqarnaraluaqisoq, meeraq eqqarsaatigineqarnerusariaqarpoq, Jens-Frederik Nielsen oqarpoq.  

Immitsinnulli eqeersartariaqarpugut:

- Ima paasineqassanngilaq angajoqqaanik imaannaanngitsorsiortunik uparuartuilluta tikkuartussasugut. Ilaqutariippassuit ajornartorsiutinik oqimaatsunik atugaqarput. Atornerluinerit, nakuusernerit, tarnikkut atugarliuutit, pissakilliornerit, kingunerluutit kiserliornerullu piffissaagallartillugu qanoq iliuuseqanngikkutta angerlarsimaffik iluaniit sequtsersinnaavaat, Jens-Frederik Nielsen oqarpoq.

- Taamaattumik siusinnerusukkut ikiorsiisariaqarpugut. Kommuneqarfiit, peqqinnissaqarfik, paaqqinnittarfiit atuarfiillu pitsaanerusumik suleqatigiittariaqarput angajoqqaat ikiorsertarlugit nukittorsarlugillu ilaqutariit toqqissisimanartumik sinaakkuteqartinnissaat qulakkiissagutsigu.

Nammineq aalajangiisinnaaneq iliuuseqarnerusinnaanissarlu

Jens-Frederik Nielsenip innuttaasunut neriorsuutaa kingulleq tassaavoq, naalakkersuisut ‘nunarsuatsinni iliuuseqarsinnaassuserput nukittorsarniarparput, Nunatsinnilu ineriartornissamut sinaakkutissat pitsaanerusut pilersillugit.’ 

- Nammineq aalajangiisinnaanerput annertusarneqassasoq sulissutigissavarput, kisianni tamanna innuttaasut ingiaqataaffigisinnaasaannik pissasoq, aningaasaqarnikkullu artukkiinngitsumik, Jens-Frederik Nielsen oqarpoq:

- Suleqatissat uatsinnik ataqqinnittut suleqatiginissaat nukittorsassavarput. Aningaasaliisartut orniginartumik neqeroorfigisassavagut, inuussutissarsiornikkut pissutsit ineriartortillugit, Kalaallillu Nunaat periarfissanut piviusorsiortumik naligiissumillu suleqataaniartunut ammasuusoq qulakkeerlugu. Oqaatigissavarpulli Nunatta innuttaannut ataqqinnissuseqanngitsunut Kalaallit Nunaat matoqqavoq.

Naalakkersuisut EU-llu suleqatigiinnissamut qanittukkut isumaqatigiissutaat naalakkersuisut eqqissisimasumik, ataqqinarpalaartumik aalajangersimasumillu nunanut allanut politikkeqarnerat assersuusiaralugu ilaatigut maluginiaqquaa.

- Nuna qanoq ikkaluartorluunniit nunarsuarmi maanna isigilikkatsinni kisimiiIluni inissisimaffeqarusunngilaq. Aamma uagut. Taamaattumik patajaatsumik toqqammaveqarnissarput anguniarlugu sulissuugut. Danmark peqatigalugu. Nunat Avannarliit peqatigalugit. EU peqatigalugu. Canada peqatigalugu. Nato peqatigalugu, USA peqatigalugu, suleqatigisinnaasagullu nunat innarligassaanngissusiannik nunallu tamalaat akornanni isumaqatigiissutit inuillu pisinnaatitaaffii pillugit ataqqinnillutillu akuerinnittut peqatigalugit. Nerisassat allagartaani allassimaannarata aamma nerrivimmi issiaqataassaagut.