Jens Erik Kirkegaard Folketingimut qinigassanngortittoq

Jens-Erik Kirkegaard Folketingimut qinigassanngortinnissani eqqarsaatigilluarnissaa pisariaqartissimallugu tusagassiutinut nalunaarummi allappoq.

Aamma allappoq kaammattorneqaqartaareerluni maanna sassarnissani aaliangiussimallugu.

Sulisartut pillugit kiisalu tutsuiginartumik Nunatta tusaamaneqarneranik nukittorsaasinnaasumik qinersisartut qinigassaqarniassammata sassarpunga, Jens-Erik Kirkegaard allappoq.

Sisamanngormmat Aleqa Hammond, Martha Abelsen, Pitsi H. Høegh aamma Erik Jensen Siumumit qinigassanngortittut ilisaritinneqarput.

Kingornalu Aleqa Hammondip sassarneranik isornartorsiuinerit imaaginnavipput, taannami Nunatta karsianik 100.000 koruunit sinnerlugit atornerluisimasoq paasineqarnikuummat.

Siumumi nutaaliorusuttut amerlavugut. Siumut allanngortinnianngilara, qulakkeerusupparali naleqartitat ataqqeqatigiinnerullu aqqani nunarsuarmi niperput ersarinnerulernissaa. Inuit uannik ilisarisimannittut naleqartitakka ilisimavaat, tassaasut; tutsuiginassuseq, maniguunneq tamaviaarlunilu anguniagaqarneq, Inatsisartuni ilaasortaq Jens Erik Kirkegaard tusagassiutinut nalunaarummi allappoq.