Jens B: Tusagassiinerit isornartut politikerinit ilikkarneqartariaqarput
Taama isumaqarnermi saniatigut, Jens B. Fredriksen aamma isumaqarpoq, Naalakkersuisut tusagassiutinut nalunaarutit atorpallaaraat aamma atorfilittamik isumaat sakkugerusunnerusaraat, namminneerlutik tusagassiortunik oqaloqateqarlutik sassarnerminnut taarsiullugu.
Tusagassiortut apeqqutaat, ilaatigut isornartorsiuinermik tunngaveqartut aqqutigalugit inuiaqatigiinnut paasissutissat politikerinit tunuarsimaarfigineqartariaqanngitsoq, Jens B. Frederiksen isumaqarpoq.
- Isumaga naapertorlugu politikerit pisussaaffigaat, nipagersimasussaatitaaneq unioqqutinneqartinnagu pisunut assigiinngitsunut oqaaseqarnissaat. Taamalliornikkut Nunatsinni innuttaasut pisunut peqataatinneqarnerat anguneqassammat. Oqaaseqarusunngeriarluni tamatuma kingorna oqluttuaq saqqummerpat taava tusagassiortunik uparuaaneq pissusissamisoortuunngitsutut uanga isigaara, Jens B. Fredriksen oqarpoq.
Taassuma aamma isornartorsiorpai, Naalakkersuisunut ilaasortat misilittagakitsut, ilaatigut Steen Lynge aamma Nick Nielsen tusagassiortunit apersorneqarnerminnut atatillugu narrujuummiavallaarneri, ingammik akisussaaffigiligartik pineqaraagat pitsaanngitsumillu tusagassiortunit pineqarsorigaagamik, ilaatigut Facebook aqqutigalugu isummaminnik saqqummiisarneri isornartorsiorlugu.
- Facebook-ikkut qanittukkut atuarneqarsinnaavoq Steen Lynge-p aamma Nick Nielsenip tusagassiortut pillugit uparuaataat, tassa tamanna kusanaattutut uanga isigaara, Jens B. Fredriksen oqarpoq imalu nangilluni.
- Tusagassiortut isornartorsiuinernik inuiaqatigiinnut tusartitsinngippata, taava aarleqqutigineqarsinnaavoq politikerit piumasaannarminnik iliulersinnaaneri, tamanna qanga takusareerparput taamalu pissuseqarneq uteqqikkusunngilarput.
Naalakkersuisunut ilaasortat kisiita Jens B. Fredriksen isornartorsiunngilai aamma isornartorsiorpaa, NunaFondenip siulersuisuisa siulittaasuata, Per Berthelsenip tusagassiortunut oqaaseqarusunnginnermi kingorna Facebook-ikkut tusagassiortunut isornartorsiornera.
- Soorunami Per Berthelsenip Facebook kiffaanngissuseqarluni atorsinnaalluarpaa, kisianni oqaaseqausunngeriarluni tamassuma kingorna Facebookikkut uparuaavoq. Taamaammat tusagassiortut kiffaanngissuseqarlutik tusagassiisarnissaat tapersersortariaqarparput. Demokraatit siulittaasuat, Jens B. Fredriksen.
