Jens B. Frederiksenip Inatsisartut isumaat utaqqimaarniarpaa

Taasumunnga peqqutaavortaaq, Angallannermut Isumalioqatigiissitap isumaliutissiissutaasa, Inatsisartuni oqaluuserineqarnissaat.

Kommunip Kujalliup borgmesterianit Simon Simonsenimit sapaatip akunnerata siuliata ingerlanerani Naalakkersuisunut inassuteqaatigaa kiffartuussinermut isumaqatigiissutip Air Greenlandip namminersorlutillu Oqartussat akunnerminni kujataani angallanneq pillugu sukkanerpaamik atsioqatigiissuteqassasut. Tassa pineqarluni aappaagumiit qulimiguullit S-61-it atorunnaarsikkiartuaarneqalernissaanni kujataani angallannerup kingumut ajorseriaqqinnissaa annilaangassutigineqarluni. Tamannali pillugu Jens B. Frederiksen akissuteqarpoq:

2013-imi januaarip aallaqqaataata tungaanut kiffartuussinissamik isumaqatigiissuteqareerpugut, soorunami piffissap taassuma kingorna isumaqatigiissut piareersarluarneqartussaavoq. Taanna suliassaq ingerlannikuugaluarpoq, kisianni utaqqimaarniarlugu Angallannermut Isumalioqatigiissitaliap inassuteqaataa kinguartinnikuuarput, taamaammat sivitsuinikuuvugut januaarip aallaqqaataanut 2013-imut.

Kujataani angallannerup ajorseriannginissaa pillugu Kommune Kujallermi borgmesterimit Simon Simonsenimit ujartorneqarpoq. Kiffartuussinermut isumaqatigiissutip 2013 utaqqeqqaanngikkaluarlugu sukkanerpaamik Namminersorlutik Oqartussat Air Greenlandillu akornanni atsioqatigiittoqarnissaa. tamannali Jens B. Frederiksenimit itigartinneqarpoq:

- Kiffartuussinissamut isumaqatigiissut 2013-inip aallaqqaataata tungaanut ingerlavoq, aamma piffissap taassuma kingorna qanoq isikkoqassanersoq tassani aallaaviusorujussuussaaq Inatsisartuni eqqartuineq qanoq ingerlassanersoq. Inatsisartut oqariartuutaat soorunami uagut aamma tusarniartussaagatsigit.