Jens B. Frederiksen: Utoqqatsermat nuannaarutigaara

Inatsisartut siulittaasuata Jonathan Motzfeldtip tallimanngormat unnukkut ilasseqatigiinnermi iliuuserisimasani maanna utoqqatsissutigai.

Inatsisartut ukiakkut ataatsimiilernerannut atatillugu Hans Egedep Illuani unnukkut ilasseqatigiittoqarpoq, Demokraatillu sinnerlugit inatsisartunut ilaasortaq Jens B. Frederiksen Jonathan Motzfeldtimit appisaluunneqarpoq, ajuallaatigeqisaminik.

Taama pineqarnini inatsisartut siulittaasoqarfiannut suliassanngortippaa, maannalu Jonathan Motzfeldt pisortatigoortumik utoqqatsissuteqarpoq.

Jens B. Frederiksen ima oqarpoq:

- Soorunami nuannaarpunga utoqqatserfigineqarama, aamma pissusissamisoortutut isigaara, taanna inuttut assorujussuaq nammineq nuannaarutigaara, Jens B. Frederiksen oqarpoq, nangipporlu:

- Inatsisartut siulittaasuat atorfimminik ataqqinnilluni ingerlatsisussaavoq, taamaammat maalaarutiga tunuartinnavianngilara. Siulittaasoqarfik maalaarummik naliliisussaapput, utoqqatserfigineqarnissarlu attallugu, Demokraatit sinnerlugit inatsisartuni ilaasortaq Jens B. Frederiksen oqarpoq.

Jonathan Motzfeldt pisimasoq pillugu oqaaseqarusunngilaq, Hans Egede-lli Illuani pisut pillugit utoqqatsissuteqarnini innersuussutigalugu.