Jens B. Frederiksen siulittaasunngorusuppoq

Demokraatit tunuliaqutaralugit inatsisartuni ilaasortaq Jens B. Frederiksen aperaarput sooq taama iliulersaarnersut.

- Oqassalluni peersikkusukkipput sualuppallaarpoq tassami ippassaq siulersuisuunerit ataatsimiipput, aalajangerneqarporlu demokraatit ukioq manna juulip 8-ni immikkut ataatsimeersuassasut. Ataatsimeersuarnissami siunertarineqarpoq nutaamik siulittaasorsiortoqarnissaa siulersuisunillu nutaanik qinersisoqarnissaa, Jens B. Frederiksen oqarpoq.

Taanna nassuiaavoq annikitsumik pisoqarnera tunngavigalugu pisariaqartissimagitsik nutaamik siulittaasussarsiortoqarnissaa.

- Siulittaasutta piumaffiginikuuaatigut 100 procentimik ataqqillugulu ataqqissagipput siulersuisulli taama isumaqanngillat, Jens B. Frederiksen oqarpoq.

Taanna erseqqissaavoq demokraatit pingaartilluinnarlugu ataqqillugulu oqariartuutigisaritsik tamat oqartussaanerisa pingaartinneqarnissaat.

Jens B. Frederiksen aperaarput siulittaasuminnik taarseerusulernerat politikkimut attuumassuteqarnersoq imaluunniit inuttut attuumassuteqarnersoq.

- Politikkimut tunnganngiivippoq aqutseriaatsimulli tunngalluni, oqarpoq.

Erseqqissaavorlu Per Berthelsenip partiimik pilersitsisimanera tanngassimaarutigigitsik, piffissanngorsoraalligooq allanngortoqarnissaa.

Aperaarput kina siulittaasussatut piukkunneqarnersoq.

- Amerlanerussuteqartunit uanga Jens B. Frederiksen piukkunneqarpunga, amerlanerilli taasaat soorunami ataqqissavara, taama oqarpoq demokraatit tunuliaqutaralugit inatsisartuni ilaasortaq Jens B. Frederiksen.