Jens B. Frederiksen AGF pillugu apeqquteqaateqarpoq
Tunisassiorfinnik qulingiluanik tunisisimaneq qanorpiaq ingerlanneqarsimava? Arctic Green Foodimik piginnittuulersoq pisortaniit tapiissutinik suli pisassava, taamaappallu, qanoq annertutigisumik tapiiffigineqartassava, sunalu piumasaqaataassava? Direktørip atorfeqarnera ingerlaannassava?
Inatsisartunut ilaasortap, Jens B. Frederiksen ip, Demokraatineersup, Naalakkersuisunut apeqquteqaatit 13-it ullumi nassiuppai, apeqqutillu ilaat taama nipaqarpoq.
Arctic Green Foodip nunaqarfinni tunisassiorfiutaasa sinnerisa tunineqarnerannut atatillugu Jens B. Frederiksen arlalissuarnik apeqquteqarpoq. Tunisassiorfiit sinnerisa imminut akilersinnaasumik ingerlalernissaannut naleqqussaanissaq siunertarineqarpoq, Jens B. Frederiksenillu Naalakkersuisut nassuiaaqquai, 30 millioni koruunit atorlugit kiffartuussinermik isumaqatigiissusiornermit allaanerusumik inuiaqatigiinnut iluaqutissiisoqarsinnaanersoq.
