Jens B.: Aleqap Naalakkersuisut tunuartittariaqarpai
Aleqa Hammondip Naalakkersuisooqatigiit tunuartittariaqarpai. Naalakkersuisuni kanngunartuliorneq kingulleq taamatut kinguneqartariaqartutut Demokraatit siulittaasuata, Jens B. Frederiksenip isumaqarfigaa.
Namminersorlutik Oqartussani inatsiseqarnermut pisortap, Andreas Salmonyp, allagaatinik takunnissinnaatitaanermik piumasaqaateqarnermut tunngatillugu inatsisinik unioqqutitsiumannginninni pissutigalugu soraarsitaasimaneranik AG-p allaaserisaqarnera tunngavigalugu taama sakkortutigisumik qisuariaateqarpoq.
- AG-mi allaasineqartut ilumoorpata, taava Aleqa Hammond allatut iliorsinnaanngilaq kinguneqartittariaqarlugulu. Naalakkersuisut tunuartittariaqarpai qinersisoqarnissaanillu suaaruteqarluni. Taava Naalakkersuisut sivikitsumik atuunnerini taama sakkortutigisunik pisimasut kinguneri torrersaanneqartariaqarput.
Jens B. Frederiksen taama oqarpoq, nangillunilu oqaatigaa AG-p paasissutissat pissarsiarisimasa ilumoorpata, taava illersorneqarsinnaanngilluinnartoq, inatsisinimmi unioqqutitsinernik arlaqartunik imaqarmata.
- Inatsiseqarnermut pisortap soraarsitaaneranut tunngatillugu, aammali unioqqutitsilluni paasissutissanik aviisimut toqqorterisoqarsimanera pissutigalugu.
Pisoq pillugu paasisaqarnerujumallutik maanna marlunnik iliuuseqarniarlutik Demokraatit siulittaasuat oqaluttuarpoq.
Siullertut, pisoq pillugu § 37 naapertorlugu sakkortuumik apeqquteqaateqartoqassaaq. Kingornalu akissutit takkuteriarpata, Aleqa Inatsisit Atortinneqarnerannut Ataatsimiititaliamut nassuiaajartoqqullugu aamma aggersarneqassasoq, Jens B. Frederiksenip oqaatigaa.
Aleqa Hammond Radioaviisimit oqaaseqartinniaraluaratsigu iluatsissinnaasimanngilarput.