Jazzillammaat Katuami tusarnaartitsilerput

Tallimanngorpat arfininngorpallu tusarnaartitsisoqanngitsiarnerani nipilersortartut soqutiginnittut qallunaaq taanna tenorsaxofonertartoq nipilersoqatigiivilu pikkorilluinnartut isumassarsiorfigisinnaavaat. Nipilersortartullu periarfissamut soqutiginnittut Katuamut paasisassarsiorsinnaalereerput.

- Taamatummi nipilersortartunik allanik isumassarsiortitsisarnivut siornatigut iluatsilluartaqaat. Nuummili nipilersortartut qanoq pikkoritsiginersut soorunami naluara, taakkuli qiimmassarsinnaassallugit uangalu aamma qiimmassarneqarsinnaanissara neriuutigiinnarpara. Uagummi appisimaagassavut suunersut oqaluttuarissavagut, nipilersorfigisarsimasavut oqaluttuarissallutigit ilikkarsimasatsinnillu avitseqatigiissuteqassalluta. Tassa nipilersortartut uagutsinnik nipilersoqateqarnissaanik periarfissaqarluassammata Kalaallit Nunaannukarnissara qilanaareqaara, Jan Harbeck knr.gl-imut taama oqaluttuarpoq.

Jan Harbeck Sisamaasartuilu 2008-mili nipilersoqatigiittalerput, 120-riarlutillu tusarnaartitseqatigiittareermata nipilersullaqqilluinnartut Katuami tusarnaariarumagaanni takannarsuaq. Taakku nipilersulerpata Katuami tusarnaartitsisarfeeqqami sakkortusaatitaqanngitsumik – tassa akustiskimik – tusarnaartitsisussaammata tusarnaartut nipilersortullu nuannissassaqaat.

- Nipilersoriaaseq uagutsinnut tulluartoq nassaarereerparput. Nipilersoqatigiilluartarattami tusarnaariartussat uggorisassaqanngillat. Maannali tassa siullerpaamik Kalaallit Nunaannukartussanngorpugut, Danmarkillu saniatigut Spaniami tusarnaartitsisareertugut oqaatigisinnaavara, ajussanngikkuttalu Brasiliamut tusarnaariartitsinissarput naatsorsuutigalutigu. Taamaammat Nuummiut tusarnaartilerutsigit qiimasuussasut neriuutigaarput, uagulli nuannisartitsiumalluta takkunnissarput kikkut tamarmik naatsorsuutigissavaat, Jan Harbeck oqarpoq.