Japanip illersornissamut ministeria tunuarpoq

Japanip illersornissamut ministeria tunuarpoq.

Sorsunnnersuup aappaani Japanimi narrujuumminartumik atombombimik qaartitsisoqarsimaneranik oqaaseqareersorlu tamanna pivoq.

Atombombit Nagasakimut Hiroshimamullu nakkartinneqarnerat pisariaqarsimavoq, sorsunnersuup aappaa unitsinniarlugu. Taama oqarpoq Japanip illersornissamut ministeria Fumio Kyuma arfininngormat universitetit ilaanni pulaartilluni.

Oqaaserisai eqqugaanikunut ilaqutaasunit annannikunillu ingerlaannaq kamatsitsilerput.

Aggustip arfernani qulingiluaannilu 1945-mi qaartartumeerinerit ikinnerpaamik inunnik 120,000-inik ataatsikkut toqunerannik naleqarput. Marloriaataalu kingorna aamma napparsimallutik toqullutik.

Taamaammat Japanimiut amerlanersaat nalunngisaqarput Hiroshimami Nagasakimilu qaartartumeerinerup kingorna toqunikunik, napparsimalernikunik, annannikunilluunniit.

Illersornissamullu ministeri Nagasakimiuunera suli kamatsitsineruinnarpoq.

- Nagasakimiuuvoq, kanngunaqaaq Nagasakermioqatigalugu, taama oqarpoq 75-inik ukiulik Nagasakimi qaartartumeerinermit annannikoq.

Kyuma oqaaserisimasani aqaguani utoqqatsissutigai, oqarlunilu taama oqarnermini, USA-p ukiut 65-it matuma siorna qanoq eqqarsarsimanera paasitiinnarlugu.

Utoqqatsernerali iluaqutaanngilaq, ministeriunerup Shinzo Abe-p illersornissamut ministerini ataasinngormat naveerpaa, ministerillu allat arlallit tatiginninnginnerminnik nalunaarutiginnipput, illuatungiliuttullu Kyuma-p tunuarnissaa piumasaqaatigaat.

Kyuma-lu ullumi tunuarpoq. Ministeriuneq Abe nutaamik illersornissamut ministerissamik sivitsunngitsoq sassartitsivoq. 54inik ukiulik Yuriko Koike toqqarneqarpoq, Japanilu siullermeerluni arnamik illersornissamut ministereqalerpoq. Naalagaaffiup isumannaatsuunissaanik siunnersortitut sulisuusimavoq, oqarporlu Japanip atombombeqarnissaa isumassaqanngitsoq.