Japanimiut paannittartut peqquserlunnermut peqataasarsimapput

Paannilluni peqquserlulluni unamminerit. Sioorasaaraluni akiliisitsiniarneq. Angutit 100 kg sinnerlugu oqimaassusillit. Kanngunartuliami Japanimiut paanninnermik timersuutaanni nuannarineqarnerpaami, Sumobrydningimi, pineqartut ilaat taakkuupput.
juulip 06-at 2010 15:46

Paannittartut peqquserlulluni aaqqissuussinermut peqataasut, taamaalillutillu peqquserlullutik aningaasarsiortut, paasineqarpoq. Tamanna pillugu Japanip TV-ani ukiuni 57-ini misigineqarsimanngitsoq pisussanngorpoq, tassa julip ingerlanerani unamminerit pingaarutillit tv-kkut takutinneqartussaajunnaarmata.

Timersortunik isiginnaarneq Japanimiut nuannarisavissuaraat Sumobrydningilu timersuutini nuannarineqarnerpaalluni.

Paannittartut 55-it Japanimiut mafiaannut akuullutik peqquserlulluni aningaasannanniarnermut sioorasaarillunilu akiliisitsiniarnermut peqataasimanerat paasineqarmat kanngunartuliaavoq annertooq. Peqquserlunneq arpattagiarnermut, baseball-imut, nallukattarnermut iliorartakkanillu mahjongg-imut unamminernut tunngavoq.

Paannittarneq ileqqulersuuterpassuarnik ilaqarmat upperisamullu attuumatinniarneqartarluni taamaammat pisoq annertuumik kanngunartuliorfiuvoq. Unammineq pitsaasoq illernartutut isigineqartarmat paannittartut ileqqorissaarnissaat pissuserissaarnissaallu pingaartinneqartarpoq.

Kanngunartuliaq maanna qulaajarneqalersoq kanngunartulianut allanut ilaaginnarpoq. Paannittartut arlaqartut hash-imik pujortartarsimanerat 2008-mi paasineqarmat kattuffimmiit ilaasortaajunnaarsinneqarput.

Japanimi kulturministerip paanilluni timersortartut mafianut attuumassuteqarnerat misissortinniarlugu ataatsimiititaliarsuarmik pilersitsivoq. Paannittartut aningaasaliisuat tunuarpoq ukiullu sinnerani unammisarnissat unitsinneqarataannaasut Japanimi premierministeri ivertinneqarlaaq oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq