Japanimiut ilisimatusaatigalugu arfannialersut
Japanip Sikuiuitsup Kujalliup Australiallu akornanni arfanniarnissamik pilersaarutiminik taamaatitseqqullugu USA-p ataasinngormat kajumissaarpaa.
Allattoq Elisa Isaksen
novembarip 20-at 2007 07:55
- Japanimiunit oqaatigineqartutut arfanniarneq ilisimatusarnermik siunertaqarpat, taava paasissutissat tamakkua pissarsiarineqarsinnaapput arfernik toqoraanngikkaluarluni.
Amerikamiut nunanut allanut ministeeriaqarfiata oqaaseqartitaa Sean McCormack taama oqarpoq.
McCormackip ilanngullugu oqaatigaa Japanimiut qipoqqarnik tikaagulliusaanillu toqoraannginnissaat pingaaruteqartoq, taakkumi piniaqqusaanngimmata.
Japanimiut arfanniutaat Japanimi illoqarfimmit Shimonoseki-mit sapaatiummat aallarpoq Sikuiuitsup Australiallu akornanni arfanniarniarluni, tamaani pisarineqassapput qipoqqaat 50-it, tikaagulliusaat 50-it kiisalu tikaagulliit 935-t.
