VIDEO Japanimiu Nanookikkunnik nuannarinningaartoq Nuummut tusarnaariartoq
- Immaqa oqarsinnaavugut nunarsuarmi fan-iunerpaaq, Christian Elsner qatanngutinilu Frederik Elsner Ai Ai appisimaareerlugu KNR-imut qungujorujussuarluni oqarpoq.
Nozaki nipilersornermik suliaqartuuvoq tusarnaariarlunilu angalarujussuarsinnaasarluni.
- Nanookikkut immikkuullarequtigivaat nipilersugaat nuannerluinnartuummata kiisalu nipilersornermikkut inunnik nuannaartitsiniallaqqissuullutik, kalaallisullu erinarsortarnerat nuannarilluinnarpara, Yoko Nozaki kalaallisut paasisinnaanngikkaluarluni taama nassuiaavoq.
Aamma atuaruk Nanookkikkormiut Nuup Mittarfiani 'Bandswap'-eqatigalugit
Yoko Nozakip Nanookikkunnik maanna pingajussaa tusarnaariarpoq. Siullermik siorna aasakkut Norgemut tusarnaariarlugit angalasimavoq.
- Pingajussaa ornilerpaatigut. Siullermik siorna aasaq Norgemi appilluta takoriasaarparput, tupalluta. Taava aamma siorna novembarimi Taiwanimi nipilersoriaratta aamma tikeraariarami. Taava massakkut kiisami nunatsinnut aamma tikippoq. Tupinnaqaaq taama nuannarineqartigisinnaalluni inummit, Christian Elsner oqarpoq.
Nanookikkut ilimanaateqarluartut Yoko Nozaki isumaqarpoq.
- Nipilersoriaasiat nunarsuarmi sumiluunniit nuannarineqarluni tusarnaarneqarsinnaavoq. Aamma ilimagaara Japanimi tusaamasanngukutsoorsinnaasut, Yoko Nozaki oqarpoq.
Arfininngorpat sapaatiuppallu Nanookikkut Arctic Sounds nipilersornermik festivalimi Sisimiuni appisimaassapput.