Japanimi tikaagullinnialerput
Japanimi umiarsuaaqqat arfanniutit arfinillit Atlantikup kujasissuanut ukiumoortumik arfanniarlutik ippassaq aallarput.
Japanimi aalisarnermut ministeriaqarfik naapertorlugu tikaagulliit 850-it tikaagulluisaallu qulit pisarinissaat siunertarineqarpoq. Arfanniarneq pillugu ataatsimiititaliarsuarmit, IWC-mit taakku akuerisaapput.
Japanimi ilisimatusarneq siunertaralugu arfanniarneq aallartikkaangat uumasunik nunarsuaq tamakkerlugu illersuiniaqatigiiffiit amerlanersaat tamatigut kamattarput, nutaarsiassaqartitsivik BBC allappoq.
Arfanniartarnerup ilisimatusarnermut atorneqarsinnaanera uumasunik illersuiniaqatigiiffiit upperinngilaat. Japanimiulli namminneq oqarput, ilisimatuut japanimiut ikiorsiullugit arferit angissusaat, nereriaasii kinguaassiorsinnaanerilu paasisaqarfigisinnaagitik.
Arferup neqaa tunineqarsinnaavoq, taamaalilluni ilisimatusarneq aningaasaliiffigineqarsinnaasarluni.
