Japanimi chipsissaaleqisut
Japanimi innuttaasut chipsissaaleqinermik maannakkorpiaq eqqugaaqqapput, tamatumalu kingunerisaanik chipsit akitsorujussuarsimapput. Angalaneq pillugu nittartagaq Atlas Obscura taama allaaserisaqarpoq.
Nunatsinni mannissaaleqineq silarlunneranik umiarsuillu kinguaattoornerinik pissuteqarpoq.
Japanimili chipsissaaleqineq siallerujussuartarnera pissutigalugu naatsiianik katersuinerup eqqugaaneranik pissuteqarpoq.
Tamatumalu kingunerisaanik chipsit poortamut ataatsimut akii qaffarujussuarput, poortaq ataaseq 1.250 yennit tikillugit akeqalerluni, tassalu poortamut ataatsimut 80 koruuningajannik.
Chipsissaaleqineq qaqugu qaangerneqassanersoq suli nalunarpoq, Japanimili chipsiliorfiit anginerit ilaata naatsiianik USA-mit tikisitsisoqassanersoq maanna isumaliutigerpaluppaa.
/ritzau/