Januaarip aallaqqaataaniit nunatsinni eqqartuussiveqarnikkut nutarterineq atuutilissaaq

Sungiunniagassarput nutaaq tassaavoq - Nunatsinni Eqqartuussivik - taannalu illoqarfinni eqqartuussiviit Nunatsinnilu Eqqartuussisuuneqarfiup, akornanni inissisimassaaq. Nunatsinni Eqqartuussisuuneqarfik, Østre Landsrettimut taarsiullugu ingerlatitseqqiffiusalissaaq. Sulianillu tunngaviusumik allanngortitsisinnaanermut tunngassutillit suli Danmarkimi Højesteretimi pisassapput.

Eqqartuussivittaassaq - tassa Nunatsinni Eqqartuussivik - suliassani qitiussaaq, taamaalillunillu suliassat inatsisilerinermut tunngassuteqartut oqimaannerit nunatsinni eqqartuussivinnit suliarineqarsinnaanngussapput.

Tassa illoqarfinni Eqqartuussiviit Nunatsinnilu Eqqartuussiviup ingerlatitseqqinnissamut Nunatta Eqqartuussisuuneqarfiata saniatigut Østre Landsret ingerlatitseqqinnissamut periarfissaassaaq.

Illoqarfiit eqqartuussiviini eqqartuussisut inatsisilerituutut ilinniarsimanngikkaluarlutik suli eqqartuussisinnaassapput, Nunattali Eqqartuussiviani aamma Nunatta Eqqartuussisuuneqarfiani inatsisilerituutut ilinniarsimasunik inuttalersuisoqassaaq.

Eqqartuussisarfimmi siullermi, tassa illoqarfiup eqqartuussiviani, inatsisitigut illersorneqarsinnaasumik ingerlatsinissaq anguniarlugu ukiup massuma ingerlanerani illersuisut pikkorissartinneqartarsimapput. Pikkorissaanerit modulit marluk, akornanni suliffimmik misiliinertalerlugu agguataarneqarsimapput.

Tassani 35-t aallartipput, 26-llu moduli kingulleq naammassisimavaat, maannalu Nunatsinni eqqartuussivimmi illersuisutut akuerisatut allagartaqalerlutik, pikkorissaasoq inatsisileritooq Finn Meinel ima oqarpoq:

- Oqarsinnaavugut illersuisut suliaminnut atatillugu massakkut piareersimanerulersut, taakkuami eqqartuussivimmi siullermi unnerluussanik illersuisuusarput.

Illoqarfiit ilaanni allagartalinnik illersuisoqannginnera Finn Meinelip aamma oqaatigaa, taamaammallu ukiup nutaap aallartilaarnerani illersuisussanik pikkorissartitseqqinniarput. Illersuisunilli amigaateqarneq aaqqissuussinermi nutaami ajornartorsiutit annerpaartarinngikkaat, Finn Meinelip oqaatigaa, ukiorpassuit ingerlareeraluartut eqqartuusseriaatsimut inatsit, tassa pinerluttulerinermi inatsit, suli kalaallisut taaguuserneqanngillat, tamannalu ima oqaatigaa:

Eqqartuussiveqarnermi kalaallisut suli taaguusersuinnginneq ajornartorsiutinut ilaavoq, tassami januaarip aallaqqaataani inatsisissarpassuit kalaallisuinnaq paasinnittartunit atuarneqarsinnaanngillat, ajornartorsiullumi taannarpiaq illersuisussanut kinguarsaataalluarsinnaavoq.

Naak isumaliutissiissut kalaallisuunngortinneqarsimagaluartoq, taamaattoq inatsisit sullissinermi atugassat qallunaatuinnaq allanneqarsimasut aamma sooq kalaallisuunngortinneqarsimannginnersut nalulluinnarpara, kisianni tamatuma ajornartorsiutinngornissaa ilimagilluinnarpara.

Nunatta Eqqartuussiviani qullersaasussaq Thomas Trier Hansen oqaaseqartinniaraluaratsigu iluatsinngilarput.

Eqqartuusseriaatsimut inatsimmik aamma pinerluttulerinermi inatsimmik kalaallisuunngortitsinissaq Illersuisut peqatigiiffittaavanit malersorneqarnissaa ilimanarpoq, tassanilu Bjørn Chemnitz Nuummeersoq siulittaasuuvoq, inatsisileritoorlu Jens Paulsen siulittaasup tulleralugu, inatsisileritoorlu Finn Meinel peqatigiiffimmut allattaallunilu aningaaserisuuvoq. Peqatigiiffittaap siulersuisuini Naja Joelsen aamma Tom Ostermann aamma ilaasortaapput.