Jakobine Leander inissiami oqoqartumi najugaqarnerminni aallartittunik astmamik KOL-imillu ullumikkut nappaateqarpoq.Assi: KNR

Jakobine Leander inissiami oquttumi najugaqartoq: Taama napparsimatigilernissara takorluunngisaannarpara

Anernikilliortarneq niaqorlukulanerlu Jakobine Leanderip uiuata ullumikkut naalliutigaat. Aappariit Nuummi inissiami oquttumi najugaqarneranni ersiutit aallartipput.

Jakobine Leander nipikitsumik ilassivoq Raadiop qaqqaanilu inissiamut nipaalluinnartumut isertitsilluni.

Uia inimi issiaarfimmi issiavoq. Qalluminik ilassivoq. Nipaannerlu nangeqqippoq.

Jakobine Leander nipikitsumik oqaluttualerpoq. Taassumalu nipikitsumik oqalunneranut pissutissaqarluarpoq.

Taassumami uia hortonimik taaguuteqartumik niaqorluttarpoq, niaqorlunnermini isip talerpiup nalaani annernangaatsiartarpoq. Jakobine Leander aamma astmamik tassa anernikilliortarnermik puakkullu nappaatigiualikkamik KOL-imik nappaateqarpoq.

Taassuma inissiaq massakkut najugaqarfigisartik nappaatigisaminnut pissutaasoraa.

- Taama napparsimalernissara takorluunngisaannarpara. Puannik ajornartorsiuteqanngisaannarnikuuvunga. Peqqittuaannarnikuugaluarluta taama nalaataqarpugut, 66-inik ukiulik, Jakobine Leander oqarpoq.

Aappariit inigisaat 2017-imi panertumik silaannaqalerpoq, oqussunnillu aappariit inaannut siaruaakkiartulerpoq. Ukioq taanna decembarimi Jakobine Leanderip pasitsaassaa uppernarsarneqarpoq.

Inissiaq aappariit ukiuni 20-ni najugaqarfigisimasaat oquppoq.

Jakobine Leander uinilu nunatsinni ukiorpassuarni ajornartorsiutaasumik taamaalillutik eqqugaapput: inissiat nungullarnikut oquttullu.

Namminersorlutik Oqartussat inissiaataanik aqutsisoq INI A/S naapertorlugu Namminersorlutik Oqartussat attartortitaannit 70-it oqupput.

Nuummi attartortut 60-it missaanniittut inigisaata oqunnera imaluunniit nalinginnaasumik nungullarnera pissutigalugu inimik nutaamik tunineqarnissaminnut utaqqipput.

Inissiat oquttut iluarsartuunneqarnerannut 170 millionit koruunit missaanniittut 2015-imiit maannamut atorneqarput. Aningaasat annerpaartaat aningaasanut inatsimmit tassunga aningaasaliissutineerput, INI-lu nammineerluni tassunga aamma aningaasaliissuteqalaarluni. INI KNR-imut paasissutissiivoq.

Jakobine Leanderip uiata atini ilanngutassiami ilaatikkusunngilaa, KNR-illu taassuma aqqa ilisimavaa.

Niaqquni iikkamut kasuttaraa

Inissiap oqummik eqqugaanera pissutigalugu Jakobine Leander uialu inissiamut allamut 2017-imi decembarimi nuutsinneqarput.

Aappariit angerlarsimaffimminnut oqoqarnera pissutigalugu suliarineqareersimasumut 2018-imi februaarimi nooqqipput.

Inissiaq qalipanneqarsimasutut tipeqartoq, Jakobine Leander oqarpoq. Taassumali oqussunnik suli naamasinnaasimavaa.

- Arlaannik susoqartoq malugisinnaaginnarpara. Pequtigut inissiami oqulimmiinnikuummata taakku oqussunneqqaarsoraagut. Taamaammat taarserpagut. Tipili suli naamaneqarsinnaavoq, Jakobine Leander oqarpoq, nangillunilu:

- Ajorneruleraluttuinnarpunga. Qasullungalu niaqorluttarpunga timigalugu tamarmi ungilattarluni.

- Anertikkalipallattarpunga, unnuamilu anernissaaleqinera pissutigalugu sinissinnaaneq ajorlunga. Makillunga pisullungalu imeriartortariaqartarpunga.


Nuummi Radiop Qaqqaani inissiaqarfimmi uani Jakobine Leander uinilu oqoqartumi najugaqarsimapput.

Jakobine Leanderillu uia aamma ajorsiartorpoq.

Taanna anigorsinnaanngisaminik niaqorluttunngorpoq, 2018-imilu aasakkut ullut tamakkiallugit napparsimaviliartartoq, Jakobine Leander oqarpoq.

Taanna Hortonsimik taaneqartartumik uteqattaartartumik niaqorluttartoq paasineqarpoq, tassungalu nakorsaanermi silaannalersuineq ilaavoq.

Jakobine Leander oqaluttuarpoq:

- Ullut tamangajaasa silaannalersortikkiartortarpoq. Piffissallu ilaani nakorsaataa naammanngimmat silaannalersuummik atortorissaarutinillu angerlaassivoq.

Ullormut sisamariarluni tassanngaannartumik niaqorlunneq nalaappaa, tamannalu pissutigalugu toqqissivissaaruttarluni.

Ajornerpaagaangami anniarnerpassuarni aaqqinniarluni niaqquni iikkama kasuttaartarpaa.

Tamanna aappariit napparsimmavimmi nalunaarsuiffianni KNR-imit takusatsinni aamma nassuiaatigineqarpoq.

Jakobine Leander astmamik KOL-imillu nappaateqartoq uialu uteqattaartartumik hortonsimik niaqorluttartoq nalunaarsukkanit aamma uppernarsarneqarpoq.

Nappaataat oquup kinguneraneernersut allassimanngilaq.

Tamatuma saniatigut Jakobine Leander ukiorpassuani tupanik pujortartarsimasoq, tamannalu KOL-imik kinguneqarsinnaasoq aamma allaassimavoq.

Aappariit inissiami oquttumi najugaqarunnaaramik iluaallannerungaatsiarsimasut nalunaarsukkani allassimavoq.

Aallartiffia

Aappariit inissiami oquttumi ukiup aappaata affaani najugaqareerlutik inissiamut nutaamut ukiorpassuarni angerlarsimaffigisimasami qanittuanut nuupput.

Taakkuli Jakobine Leanderip inissiami oqummik naamasaqaqqaarneranit ukiut pingasut qaangiuttut - inissiamut ukiorpassuarni najugarisimasaminnut uternissaminnut 2020-mi novembarimi neqeroorfigineqarput.

Ukiuni pingasuni sisamariarlutik nuuttareerlutik uani angerlarsimaffimmi – ilaqutariit assingi sinilersimasut nivingaffiammi imaanullu isikkivilerluni – Jakobine Leander nipikitsumik oqaluttuarpoq.

Inissiaq oqummik eqqugaanikuusoq oqulli peersimanngitsoq nalaatereernikuugussiuk sooq uteqqippisi?

- Maani ukiorpassuarni najugaqarpugut. Ernuttagut maani eqqaamasassaqarput, Jakobine Leander akivoq.

Jakobine Leanderip oqussunnik ullumikkut naamasinnaanngilaa, aappariillu nappaataannut ersiutit siusinnerusumit pitsaanerupput.

Taakkuli sisamariarlutik nuunnerat nappaatillu pingasut suussuserneqarnerat imminnut akisusoq oqaatigaa.

Aappariilli INI-p akisussaaffini malillugu inissiap oqoqarnera siullermik suliarisimanngikkaa isumaqarpoq.

- Kamaatigisorujussuuara. INI kamaappara. Nuuttarnitsinnut atatillugu aningaasartuutigut tamarmik. Inuusukkunnaarnikuuvugut, sipaakkattalu ilaat nutsernermut atortarpagut, Jakobine Leander oqarpoq, nangillunilu:

- Neriuppunga allat assinganik nalaataqassanngitsut.

KNR-ip isornartorsiuineq INI A/S-imut saqqummiuppaa. INI A/S-illi suliat ataasiakkaat oqaaseqarfigisinnaanagit paasissutissiissutigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl