Jakob Larsen: USAp angerlarsimaffiani ajorsartinnissaa qilanaaraarput
Angutit assammik arsartartut tullianik USA-mut unamminissaat Kalaallit Nunaannut takussutissatut annertuumik pingaaruteqassaaq. Tassami nunani, Kalaallit Nunaannik amerikap nunavissuata kattuffianit PATHF-imit anisinniarneqaraluartuni USA siuttuusimavoq, taamaattumillu kalaallinut angutinut assammik arsartartunut USA-mut ajugaaneq nuannernerpaassaaq.
– Naapertuilluartumik naammassinnittoqarpoq amerikap nunavissuata kattuffiani ilaasortaanerput IHF-ip akuersissutigimmagu.
Maanna Kalaallit Nunaat peqataaqqilerpoq tullianillu amerikap nunavissuani pissartanngorniunnerit ingerlanneqassapput illoqarfimmi 1996-imi OL-eqarfiusimasumi Atlantami, 2008-mi juunip 24-ianniit juunip 28-iata tungaanut.
– Unammisartut tamarmik immikkut kajumissuseqassapput USA unammilerutsigu, USA-llu angerlarsimaffiani ajorsartinnissaa qilanaaraarput, Jakob Larsen aviisimi sermitsiami tusagasssirotumut Noah Mølgårdimut oqarpoq.
