IWC-p atorunnaarsinnaanera uggorineqarpoq

Arfanniarneq pillugu Ataatsimiititaliarsuarmi IWC-mi ilaasortat iluanni isumaqatigiinnginnerit annertuut ingerlaannassappata, IWC ukiuni qanittuni atorunnaarsinneqarsinnaavoq, tamannalu uggornassaaq, Piniarnermut Aalisarnermut nunalerinermullu pisortaqarfimmi pisortaq Amalie Jessen oqarpoq.
Allattoq Mads Lynge
juunip 03-at 2008 17:25

IWC atorunnaassagaluarpat, Nunat avannarliit arfanniartarneq pillugu ataatsimiititaliaat NAMMCO aqqutigalugu Kalallit Nunaata arfattassai pissassiissutineqartalersinnaapput.

- IWC ukiuni arlalinni tamatut ingerlasimalluni ingerlaannassaguni imminut aserussaaq, Amalie Jessen oqarpoq. Nunat uumasunik illersuiniaqatigiinnut qanittut, ingasattajaaralutillu uumasunik illersuiniat eqqissisimatitsiniallu illuatungaanilu arfanniarnermik tapersersuisut imminnut ungasitsigitillugit isumaqarnarsinnaavoq IWC imminut aserortoq Amalie Jessen oqarpoq.

IWC atorunnaarpat tamatuma kingunerisinnaavaa arfanniarneq pillugu suliniaqatigiiffiit soorlu NAMMCO-tut ittut atorneqalersut, soorlu Kalaallit Nunaat NAMMCO-mut ilaasortaasoq.

IWC-mi assortuunnerit ukiorpassuarnilu ingerlasimasut ingerlaannassappata piffissaajaataallutillu taava IWC siunissaqarpiarnavianngilaq, tamannalu uggornartorujussuuvoq, Amalie Jessen oqarpoq. NAMMCO Kalaallit Nunaata maannakkut atorluarpaa, taassuma atorneqarnerulernissaa Amalie Jessenip naatsorsuutigaa.

Arfanniarneq pillugu Ataatsimiititaliarsuaq, IWC, juunip ulluisa 23-annit 27-at ilanngullugu Chilep illoqarfiisa pingaarnersaanni Santiagomi ataatsimiissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq