IWC-mi akerliusut illersuisullu naligiiginnarput
Ataatsimeersuarneq Chilep illoqarfiisa pingaarnersaanni Santiagomi ippassaq aallartittoq tallimanngornerup tungaanut ingerlanneqassaaq.
Ullumi oqaluuserisassanut ilaapput, ilisimatusaatigalugu arfanniartarneq, Japanip sinerissami inuiaat sisamat arfattassinneqarnissaannik kissaataat aamma Atlantikup kujasinnerusuani imartamik arfernik eqqissisimatitsiffinngortitsiniarneq.
Danmark naalagaaffeqatigiinneq tunngavigalugu Kalaallit Nunaata arfattassaanik qinnuteqassaaq. Tikaagulliit 200-t, tikaagulliusaat 19-it, arfiviit marluk qipoqqaallu qulit qinnutigineqassapput.
IWC-p ilaasortaasa affai arfanniarnermut illersuisuupput affaalu akerliusuullutik.
Danmarkip arfanniarneq pillugu kommissæria, Ole Samsing oqarpoq, Danmarki illersuisut akerliusullu akornanni inissisimasoq.
IWC-p 1986-imi aalajangerpaa arferit annerit piniarneqarnerat unitsivinneqassasoq. Taamaakkaluartoq Norge Islandilu arfattassiisarput soorluttaaq Japan ilisimatusaatigalugu ukiumut 1.000-inik arfattartoq.
