Ivigaaraasanik Kalaallit Nunaanni arsaattarfittaartoqaraluarpat iluanaarutaassagaluarpoq
Arsaattartut kattuffiata ivigaaraasanik arsaattarfeqalernissaq soqutigisorujussuuaa. Tassami nunatta nunanut allanut unammisartui nunat allat unammisartuinut nunatsinni unammisalissagaluarmata tamannalu aningaasarsiornikkut iluaqutaassagaluarpoq. Taamaalillutami arsaannerit tv-kkut aallakaatinneqarneri aningaasarsiutigisinnaalissagaluaratsigik.
- Savalimmiormiut takuinnarsinnaavavut, ivigaaraasanik arsaattarfittaarnermikkut siuariarujussuarput, tassami Savalimmiormiut Italiamut Savalimmiuni unammisussanngormata tv-kkut aallakaatitsinissamut piginnittussaanerit tunineqarput Savalimmiormiullu taamaalillutik ukiunut marlunnut aningaasartuutissatut missingersuutitik matussutissaqartilerpaat, GBU-p siulittaasua Lars Lundblad oqarpoq.
Aammattaaq Savalimmiuni arsaattartut kattuffiannit ivigaaraasat nuannaarutigineqaqaat. 1980-ikkut aallartilaaginnartut Savalimmiuni ujaraaqqanik qallersukkanik arsaattarfiit atorunnaarneqarput. Ullumikkut Savalimmiuni ivigaaraasanik angisuunik 23-nik minnerusunillu 35-nik arsaattarfeqarpoq. Arsaattarfiit angisuut Savalimmiuni kommuninit aningaasalersorneqarput arsaattarfiillu minnerit UEFA-mit, naalakkersuisunit kommuninillu ataatsimoorluni aningaasalersorneqarlutik.
- Ivigaaraasanik arsaattarfeqarnerput aningaasarsiornikkut iluaqutigeqaarput. Tassami aamma FIFA-mut UEFA-mullu ilaavugut anngunniunnernullu ilaasarluta, unamminernilu tamakkunani tv-kkut aallakaatitsinermi piginnittussaanerit millionerpassuarnik iluanaarutigisarpavut, Savalimmiuni arsaattartut kattuffianni allaffimmi pisortaq Isak Niklædal Radioaviisimut oqarpoq.
Savalimmiuni arsaattartut kattuffiannit oqaaserineqartut naapertorlugit ivigaaraasanik arsaattarfik 2,5 million koruuninik akeqarpoq Savalimmiunilu misilittakkat takutippaat arsaattarfik ukiuni arfinilinni arfineq-pingasuniluunniit atasinnaasoq.
- Arsaattarfik sapaatip akunneranut marlussoriarluni sanerneqartassaaq, saligaatsuuniassammat ivigaaraasallu nappaarinniassammata aserfallatsaalinissaallu annerusumik isumagisassartaqanngilaq. Aputaajarnissaat aamma ajornartorsiutaanngilaq tamatumunnga immikkut atortorissaaruteqaratta, ivigaaraasanut akornutaanngitsunik, Isak Niklædal oqarpoq.
GBU-p siulittaasua Lars Lundblad Asiamut angalareerluni oqarpoq, Kalaallit Nunaat soorlu Vietnamimut aamma Indonesiamut ivigaaraasalimmi unamminissamut piareersimasoq. Nuup Kommunia ivigaaraasanik arsaattarfittaarnissamut 2,8 millioni koruuninik aningaasaleereerpoq.
