Iviangikkut kræfteqalersarneq imigassartortarnerlu

Imigassap imerneqartartup annertussusaa iviangikkut kræfteqalersinnaanermut kisimi apeqqutaaneq ajorpoq. Aammattaarli imigassap qanoq imerneqartarnera apeqqutaasarpoq.

Naalagaaffiup inuit peqqissuunissaannik isumaginnittoqarfiata aamma Kræftimut Akiuiniaqatigiiffiup misissuisitsinerisa tamanna ersersippaat.

- Tassa piffissami sivikitsumi imigassaq annaarlugu imernaveersartariaqarpoq, ilisimatusartoq Lene Mørk oqarpoq.

- Piffissap sivikitsup iluani imigassaq annaarlugu imeraanni, aak imigassamik akoqarnerulersarpoq taamaalillunilu imigassap akornusiisinnaanera aamma annerulertarluni.

Nakorsat qangali nalunngilaat imigassaq iviangikkut kræfteqalernissamut qaninnerulersitsisartoq. Misissuinerullu nutaap ersersippaa imigassap timip sananeqaatai qisuariartitsisartut sunnertarai, ingammik arnat timaasa sananeqaataasa ilaat østrogen sunnertaraa. Iviangikkut kræfteqalertarnermut atatillugu paasineqarpoq, ataasinnguartoraanniluunniit iviangikkut krafteqalersinnaaneq annerulertartoq.

Taamaattorli ulorianartorsiortitsinerpaaq tassaavoq piffissami sivikitsumi annaarlugu imigassartortarneq, soorlu sapaatip akunnerisa naanerini. Tassa sapaatip akunnerisa naanerini aalakoorniapallattarneq iluaqutaanngilaq.

Taamaattumik peqqissuunissamut aqutsisoqarfiup erseqqissartariaqarpaa iviangikkut kræfteqalernissaq qaninnerulertarmat aammattaaq sapaatip akunneranut ataasinnguartugassatut arnanut killiliunneqartut 14-usut taamaallaat imertaraluaraanniluunniit.

- Imaanngilaq arnat sapaatip akunneranut ataasinnguartugassaat ikilisinneqassasut, taamaattorli erseqqissarneqartariaqarpoq arnat sapaatip akunneranut ataasinnguartugassaasut killiliunneqartut qaangernagit ataasinnguartortaraluarunilluunniit iviangikkut kræfteqalernissaq ulorianaateqarmat, Kræftimut akiuiniaqatigiiffimmeersoq oqarpoq.

- Matumani paasineqartut pingaarnersaraat iviangikkut kræfteqalertarnermut imigassaq sunniuteqarluinnartuusoq, Anne Tønnemann Kræftimut akiuiniaqatigiiffimmeersoq oqarpoq.