Ivalo Egede: Suliat pitsaassusaat qaffattariaqarput
- Suliffeqarfik ilikkartariaqarpara sulisullu ilinniarfigisariaqassallugit. Aallakaatitassiarpassuit sananeqarnissaat pilersaarutiginngilara, kisianni pitsaassutsip qaffannissaa tunaartarivara. Sulisut piorsartuarnissaat siunertarivara, suliffeqarfiullu iluani pitsaasumik attaveqaqatigiinneq salliutittorujussuussavara. Sulisut ataasinngorpat ataatsimeeqatigissavakka, pingaaruteqarmat ammasuunissaq sulisullu ammasuunissaat, Ivalo Egede oqarpoq, nangipporlu:
- Suliffeqarfippassuit avataaneersut suleqatigineqarsinnaanissaat takorloorpara. Namminersornerullutik Oqartussat soorunami suleqatigissasvagut. Ilinniarfeqarfiit suleqatigineqarsinnaapput, tusagassiorfiillu sineriammiittut suleqatigineqarsinnaapput aamma kulturip illorsui suleqatigineqarsinnaapput, kisianni aningaasat killeqarput, nunatsinni innuttaasut killeqarput, taamaattumik TV-qarferujussuit assinganik soorunami sanasinnaanngilagut, Ivalo Egede oqarpoq.