Ivalo Egede KNR-imit soraarpoq

KNR-ip pisortaanerata, nammineq kissaateqarnini najoqqutaralugu, ingerlaannartumik atorfimminit soraarpoq. KNR-imi siulersuisut pisortaanermik nutaamik nassaarnissaasa tungaanut pisortaanerup tullia Jan Berg utaqqiisaasumik pisortaanerugallassaaq.
februaarip 20-at 2013 11:44

- KNR-imi ukiut sisamat qaangiunnerini 2012-imi aningaasaqarnerup pitsaasumut saatsinnissaa iluatsippoq, taamaasillutalu amigartooruteqarunnaarluta. Tamanna KNR-ip oqaluttuarisaanerani pingaaruteqarpoq, tassungalu atatillugu suliap allamut ingerlateqqinnissaa toqqarpara namminerlu allanik misiliiniarlunga. Aaqqiis-sutissanik siumut siunnerfilinnik KNR-imullu naleqquttunik maanna nassaarniar-toqarnissaanut suliniartoqarnissaa neriuutigeqaara. KNR sullissiviuvoq pingaarutilik, taamaattumillu pitsaanerpaanik sulinermi atugassaqartinneqartariaqarluni, aamma inuiaqatigiit kalaallit ineriartortinneqarneranni sullissiviup tamat oqartussaaqataanerannik kulturimillu paarsitutut pingaarutilimmik inissisimanerata ingerlaannarnissaa kissaatigaara.

KNR-ip 2012-imut ukiumoortumik naatsorsuutai siulersuisut tulliani ataatsimiinnissaannut marsimi pisussamut atatillugu avammut saqqummiunneqassapput.
- KNR-imi sulisut tamaasa siulersuisullu siunissami ingerlalluarnissaannik kissaappakka, siulersuisullu ukiuni kingullerni sisamani tatiginnissimanerannut qujaffigalugit. KNR-ip ineriartortinneqarnerata malittarinissaa qilanaarivara, Ivalo Egede naggasiivoq.

KNR-ip siulersuisuinut siulittaasoq, Hans Peter Poulsen oqarpoq:
- Ivalo Egedep soraarniutaa ajoraluartumik tiguara. Isertuunneqassanngilaq siulersuisuinit suli tatigisaalluarmat aammalu annaanera ajuusaarutigigatsigu. Ivalo Egede KNR-imi suliat ingerlanneqartarnerisa patajaallisarneqarnerinut arlalinnut siuttuusimavoq, minnerunngitsumillu innuttaasunik kiffartuussiviup nutaarsiassatigut, qaammarsaanikkut, aliikkutassaqartitsinikkut isornartorsiuisinnaassu-seqartumillu tusagassiornikkut killiussatigut piumasaqaatinik nassuiaasinnaasimalluni.

Siulersuisunut siulittaasoq nangilluni oqarpoq:
- Siulersuisut tungaannit periarfissaq manna iluatsillugu siumut siunnerfilimmik periusissatut sulineq aallartisarniarparput KNR-imilu piffissamut tullermut sammiviliilluta. Tullinnguuppoq aamma innuttaasunik kiffartuussinissamik isumaqatigiissutip nutaamik piginnittunut isumaqatigiissutiginissaa. Suliassar-passuaqarpugut pingaarutilinnik, KNR-imillu aqutsisussamik tulluartumik pissar-siornissaq suliassaassaaq pissanganartoq. Tamanna siulersuisut tungaannit qilanaarivarput. Pisortaanerup tullia TV-milu aallakaatitassiornermut pisortaq, Jan Berg, pisortaanermik nutaamik toqqaasoqarnissaata tungaanut maannamit pisortaagallartutut atuutissaaq.