Itiviiniaq ujaarineqaleraluartoq annaanneqarpoq
Itiviiniat itiviiliivillutillu qasungaaramik ikiorneqarnissartik piumasariinnalersimavaat. Sisamanngormallu Isortumeersoq qimusseq inunnik taakkuninnga sisamanik aallersoq aallarpoq. Taakkuli sisamaasut ilaata itiviinngitsuulernini akuerisimanngimmagu itiviiniat aquttua ingiaqatigisariaqalerpaa.
Marluullutik sisoraatinik ingerlaqqipput sinnerilu arnat marluk danskiusut qimussimik Isortuliaanneqarlutik. Sisorartulli aappaa aapparminiit siuarsimavoq Isortumullu apuutiaarnerulluni.
Tallimanngormat Politiit ujaasitinneqalerput angulli ujaarineqartoq nassaarineqarsimanngilaq.
Arfininngormat tamatuma nalaani sila pujorpoq Kangilinnguanilu sakkutooqarfiup umiarsuaataa Vædderen Isortup nalaanukartinneqarpoq.
Pujorlu peerutiimeriarmat umiarsuup alapernaarsuutip qulimiguujutaa ujaasiartortillugu aallartippaat, sapaatiummallu ualikkut arfinup eqqaani ujaarineqartoq nassaarineqarpoq.
Angut itiviiniaq ajunngitsoq qasoqisoq qiiaqisorlu naassaarineqarpoq, Tasiilallu napparsimavianut apuunneqartoq Kangilinnguit nittartagaani allaaserineqarpoq.
