Itisuumi qillerinissat ernumatitsilereerput
Cairn Energy immami 650 meterinik itinerusumit aasaru misileraatigalugu qillerinissanut atatillugu Kanukoka isumaqarpoq isumannaallisaaneq eqqarsaatigigalugu Cairn Energyp tungaaniit akissutigineqartut erseqqippallaanngitsut.
- Ersarissumik akineqanngillat, taamaattumillu kommunini ataasiakkaani suliaqartuusut suleqatigiissitaq suleqqippoq. Taakkua nalilissavaat akineqanngitsut ingerlateqqissanerivut, qularnaatsumik akisoqarnissaa kissaatigivarput, Kanukokap siulittaasua Martha Abelsen oqarpoq.
Avatangiisinut suliniaqatigiiffiup avatap siulittaasua Mikkel Myryp isumaqarpoq, 1500 meterisut ititigisumi qillerigaanni maqisoornissamik kingunilimmik ajornartoornissaq qaninneruliinnarani aamma ajutoornerusinnaasup kingorna issittup imartaani qajannartumi saliinissaq ajornarnerulissasoq.
- Isumaqarpugut imminut illersorneqarsinnaanngitsoq qillerinissat itisigaluttuinnartumi ingerlanneqassappata. Eqqarsaatigineqassaaq siorna Mexicop Kangerliumanersuani pisimasoq, mianersortumik immamilu itivallaanngitsumi qillerinissat aalajangiunneqarnikuugaluarmata isumannaallisaaneq eqqarsaatiginerullugu. Maannalu killissamik qaangiillutik aalajangiinerat illersorneqarsinnaanngilaq, Avatangiisit pillugit suliniaqatigiiffiup Avatap siulittaasua Mikkel Myryp oqarpoq.
Cairn Energyp nunatsinni immikkortua kommunit tusarniaanerannut atatillugu ima allagaqarnikuuvoq.
- Capricornip qillerinermi atortut immami itisuumi atukkajunneqartut atorniarpai. Aamma qillikkat sannaat qillereriaatsilluunniit nalunarpallaanngillat", Cairns Energy allappoq.
Namminersorlutik Oqartussat aamma sillimanissakkut qasukkaannginerarput, aalajangiusimallugulu, malittarisassat nunarsuarmi sakkortunerpaat ilaat malillugit sulisoqartoq.
Aamma Namminersorlutik Oqartussat akuersissuteqarnerat aatsitassarsiornermut naalakkersuisup illersorpaa, oqarluni itisuumi qillerisarnermut atatillugu allat periaasiinut malinnaaqqinnaarlutik.
- Mexicop Kangerliumanersuani ajutoortoqarnerata kingorna itisuumi qillerisoqartareerpoq, soorlu Canadap kangiata avataani, Norskehavimi Savalimmiullu avataani 2010-mi aasakkut taama pisoqartoq. Taamaammat uuliasiorluni qillernissamut Naalakkersuisut akkuersissutaat sanilitta akuersissutaannut assingupput, Ove Karl Berthelsen allappoq.
Nunatta Avataani siorna qillerinerit itsissutsini nalinginnaasuni qillerinerit, Mexicop Kangerliumanersuani qinllerinermut ajunaarnersuaqarfiusumut naleqqiussassaanngitsutut, Aatsitassarsiornermut naalakkersuisup Ove Karl Berthelsenip taavai, Mexicommigooq avataani qillerinerit itisuumi qillerinerummata.
Tassalu nunatta avataani aasaq manna qillerinissanut pilersaarut malillugu qillerinerit itisuumi qillerinerussapput.
