Italiami tusagassiortut suliumajunnaarput
Politiit anngiortumik naalaarutaat tusagassiortunut ammaanneqartarneri inatsisissap killilersortussaavaa.
- Italiami ullumi nutaarsiassat taamaallaat franskisut tuluttullu atuarneqarsinnaapput.
Tusagassiortorpassuit inatsisissatut siunnersuummut akerliullutik Romimi naalakkersuisunut akerliussutsimik takutitsipput.
Naalakkersuisut oqarnerat naapertorlugu inatsisissap inuinnaat nalinginnarmik misissuiffigineqannginnissaat siunertaavoq, taamaalillunilu tusagassiutitigut maannatut nittarsaanneqarsinnaajunnaassapput kiisalu politiit anngiortumik naalaarutaat tusagassiortunut tunniunneqarsinnaanera killilerneqassaaq.
Inatsisissalli allamik inuit oqartussaaqataanernannik killiliisumik siunertaqartoq Italiami tusagassiortut peqatigiiffiata ilimagaa. Inatsisissammi atuutilerneratigut aaqqissuussamik pinerlunnerup akiorniarnera kiisalu tusagassiorfiit pinerlunnermik tusagassiisarnerat killilertussaavaa.
Italiami tusagassiisarfiit kattuffissuanni FNSI-mi siulittaasoq Roberto Natal taama naliliivoq.
Eqqartuussinerup aallartinnginnerani paasissutissat avammut saqqummiunneqassanngitsut anngiortumik naalaartarneq pillugu inatsimmi allaqqavoq. Italiamilu eqqartuussiviit maannatut taama arriitsigisumik sulitillugit ukiorpassuarni saqqummiussisinnaajunnaartitaassaagut, tusagassiisarfiit kattuffiata siulittaasua taama oqarpoq.
Italialli primierministeriata Silvio Berlusconip tusagassiisarfiit pasiulliutaat ilumuunnginnerarpai.
- Aviisit ullumi atuaraanni ilumoortortaqanngilluinnarput. Paasissutissiisartunik ullumikkutut ittunik tusagassiisartoqartillugu Italia naakkinaqaaq.
