VIDEO Italiami nunap sajunnerani inuit ikinnerpaamik 13-it ajunaartut

Italiap qiterpasissuani ippassaq pingasunngornermi nuna sajummat illorpassuit nakkaattoorutigineqarpoq inuppassuillu matoorunneqarlutik. Inuit ikinnerpaamik 14-it ajunaarsimassangatinneqarput.

Illoqarfeeqqani arlalinni nuna sajuppoq, illoqarfiilli inuppassuaqarfiusut eqqugaasimarpasinngillat.

Illoqarfiit eqqugaanerpaasut tassaatinneqarput Accumoli, Amatrice, Posta aamma Arquata del Tronto.

- Maanna qaammariartuleriarmat illut nakkaassimasut ilimagisatsinnit suli ingasannerusut takusinnaalerparput. Inuit matoorunneqarsimapput annassimasoqarpasinnanilu, Accumolimi borgmesteri, Stefano Petrucci, taama oqaepoq.

Illumi nakkaassimasumi ataatsimi inuit sisamat matoorunneqarsimasut siusinnerusukkut oqaatigaa, annattoqarsimarpasinngitsorlu.

Tv-qarfiup RAL-p nalunaarutigaa illoqarfeeqqami Pescara del Trontomi inuit ikinnerpaamik marluk ajunaarsimasut.

Najukkamilu atorfilittat oqaatigaat sumiiffinni pingasuni ajunaartoqarsimasoq ujaarineqartullu arlaqartut.

Nunap sajunnera nunap immikkoortuani Umbriami illoqarfiit anginersaata Perugiap kujataata-kangiani kilometerinik 75-inik ungasitsigisumi pivoq. USGS naapertorlugu annertugisassaanngikkaluarpoq, nunallu sajunnera nunap iluani kilometerinik quliinnarnik ititigisumi pisimalluni.

Nutaarsiassaqartitsivik Reuters allappoq nunap sajunnera Romami, kilometerinik 170-inik ungasitsigisumiittumi sekundini 20-ni malugineqarsinnaasimasoq.

Kingunitsianngualu nunap immikkoortuani pineqartumi nuna sajoqqippoq, tamatumuuna 5,5-inik sakkortussuseqarluni.

Italiami nunap sajuttarnera takornartaanngilaq. AFP naapertorlugu nunap immikkoortuani Aquilami nuna 2009-mi 6,3-mik sakkortussusilimmik sajummat inuit 300-t ajunaarput.

/ritzau/